حمية و رجيم | عادات تنقص الوزن على المدى الطويل

السلام عليكم و رحمة الله و بركاته

كيفكم يا مزز؟ ان شاء الله تمام

موضوعنا اليوم يهم كل أنثى مهتمة بصحتها

بعد تجربتي في الرجيمات خلال السنوات اللي فاتت عرفت نصائح ممتازة ساعدتني 

أنزل الوزن الزائد و احافظ على وزني الحالي

النصائح ممتازة للي تبي تضعف بدون حرمان و تحافظ على شكل جسمها متناسق

نبدأ

شرب الماء

النصيحة هذي الكل يقولك اياها بس قليل اللي يطبقها مع انها سهلة جدا

للأمانة انا للحين ما أشرب ثمان كاسات كل يوم بس أحاول قد ما أقدر إني أشرب أكبر 

كمية خلال اليوم

ممكن تجيبي لك حافظة مياه شكلها ظريف عشان تذكرك

أو تستخدمي تطبيق يذكرك كل ساعة مثلا تشربي كوب

اللي لاحظته من تجربتي إنه الماء ساعد بتصفية بشرتي و ترطيبها العام

سهولة في نقصان الوزن

شعور عام بالطاقة و التخلص من الخمول

و للي ما تحب طعم الماء بروحها ممكن تستخدم الماء المنكه و اللي ان شاء الله بنزل موضوع عنه قريبا

المنتجات القليلة الدسم

أنا استخدمت نظام حساب السعرات و تقليل الدهون عشان أنقص وزني

فكان جدا مهم اني اتناول سعرات محددة و ما أتجاوزها و صعب أسوي كذا مع الأكل 

كامل الدسم لأنه سعراته جدا عالية

مثلا ملعقة مايونيز كامل الدسم فيها 100 سعرة حرارية

أما قليل الدسم فيه 50 سعرة بس

خمسين سعرة شي مهول لأنه ممكن تستغليها في شي ثاني مثلا بدل ما تاكلي سندويشة بس عالغدا ما تشبعك

ممكن تاكلي سندويشة و فاكهة

اغلب الأشياء اللي ناكلها متوفرة بشكل لايت أو

Low fat

صدقيني على المدى الطويل جدا تستفيدي من هالحركة لانه الرياضة بدال ما تحرق 300 سعرة زايدة بتحرق سعرات موجودة بجسمك أصلا فبتستفيدي أكثر من الرياضة

المحلى الصناعي

انا انسانة من تعرفت على المحلى الصناعي نسيت شي اسمه سكر

حلاوته جدا تناسبني و يساعدني اقلل السعرات

فيه ناس للآن تشكك بصحته و تقول انه يسبب أمراض و و و لكن أنا أستقي معلوماتي 

الصحية من مصدر موثوق و مصدري أثبت لي أنها ممتازة و ما فيها مشاكل و اذا 

كان فيها فالمقصود هو تناول كميات مهولة مش ظرف واحد باليوم

المهم انها بديل ممتاز و استخدمها حتى في الحلويات و دائما عندي ظرف بشنطتي في 

حال احتجته و انا برى البيت

الأكل المشوي

من الأشياء اللي تساعد على تقليل السعرات هو شوي الأكل او تحميره بالفرن بدل القلي

مثلا السمبوسة و البرجر و حتى أصابع البطاطس

عشان أسهل عليك الموضوع أي شي تقليه ضيفي عليه 100 سعرة

مثلا لو حبة البطاطس فيها 50 سعرة لو قليتيها بتصير 150 سعرة

بينما التحمير بالفرن ما يضيف أي سعرة

ممكن تستخدمي القلاية الهوائية بس أنا ما عندي فمعتمدة عالفرن

عداد الخطوات

هذي الحركة جددددا ممتازة

قبل فترة اكتشفت تطبيق على جوالي يحسب الخطوات و حاط لي هدف 10,000 خطوة باليوم

و لاحظت انه الايام اللي أقضيها بالبيت ما أمشي الا 700 خطوة بس و انصدمت فصرت أحاول اتحرك أكثر عشان أوصل لهدفي كل يوم

من عرفت التطبيق للأن ما وصلت للهدف أعلى شي وصلته شي 7000 خطوة

و كانت لما رحت اتسوق للعيد

😆

طبعا الخطوات تعتبر مشي يعني رياضة فلما تحسبي السعرات بتصير رياضة بدون ما تحسي

ممكن تستخدمي البرامج بالجوال بس تراها تقريبية 

لو حابة شي بروفيشنال جربي الساعات الرياضية 

و آخيرا

التقنين اليومي

كلنا نعرف انه اتباع الرجيم يحتاج عزم و إرادة

و يومين التزام و عشرة لأ

فأنا سويت لي هالحركة، اليوم اللي حاسة نفسي بخربها أحاول قد ما أقدر اني أخربها 

على شي يسوى

يعني لو بروح عرس بدال ما أخربها بالحلى و المعجنات اللي تنحط عالطاولة

أمسك نفسي و أخربها عالعشاء عالاقل أكون حفظت كم سعرة

و نفس الشي بالأيام العادية مو آكل و بس أشوف هل التخريبة تسوى والا

و لاحظت انه بهالطريقة بدال ما أشيل هم الحلى و المعجنات و و و

صرت أحاول أحرق بس العشاء

هذي النصايح انا شخصيا أطبقها و لقيت منها فائدة عظيمة و حبيت أشاركها معاكم

ممكن تساعدكم في رحلتكم نحو صحة أفضل

لا تنسي تتابعي المدونة على حساباتها في السوشل ميديا

الموجوده فوق على يمين الصفحة

إذا حبيتي البوست شاركيه مع أخواتك و صاحباتك

All love

Ru.