SKIN CARE | تجربتي مع قناع الفحم للتخلص من الرؤوس السوداء من دايسو

السلام عليكم و رحمة الله و بركاته 

كيفكم يا مزز ؟ إن شاء الله تمام 

البشرة الصافية النظيفة هدف لكل أنثى مهتمة بنفسها 
و فيه ناس تدفع ألوف الريالات على بشرتها بالصالونات أو بمنتجات العناية على البشرة 
و تقضي ساعات و هي تدهن في نفسها 

و أنا مش منهم :) 

 من خلال قرائتي للمدونات اكتشفت إنه أغلب المنتجات اللي يستخدموها أصحابها
يا يبيلها ميزانية محترمة أو مش موجودة بالسعودية و لازم طلب من برا 

فأنا حابة تكون مدونتي مخصصة للناس اللي ميزانيتها محدودة و اللي تبي شي متوفر هنا 

يعني تقرأ البوست و تروح تشتري المنتج على طول 

خصوصا إنه كثير من بناتنا المراهقات الصغار يتعلموا أساسيات العناية من النت 
و أكيد وحده عمرها 13 سنه ما راح توفر مجموعة عناية ب500 ريال مثلا

و حابة يكون الموضوع سهل و سلس يعني روتين العناية يكون كم خطوة بس 
عشان يكون سهل الالتزام فيه 

و الروتين يا حبذا يكون مخصص لحل المشاكل اللي إنتي تواجهيها 
مثل الحبوب أو تصبغ البشره 

أو مثلا نفس مشكلة بوست اليوم اللي هي الرؤوس السوداء 

أغلب النساء يعانون من هالمشكلة بجميع أنواع البشرة 
و بعضهم يصير لون الأنف أسود من كثر الرؤوس اللي فيه 

طبعا المشكلة ذي تأثر على البشرة بشكل كبير و تخرب منظرها 
مثلا المكياج يطلع مكتل أو البشرة تبين غير نظيفة 

قبل ما أعطيكم حل المشكلة خل نتعرف على الرؤوس السوداء 

الرؤوس السوداء ايش هي ؟ 

هي عبارة عن انسداد المسام بالأوساخ المتراكمة لدرجة تكون حبوب صغيرة جدا سوداء اللون على سطح البشرة و تكون غالبا بالأنف 

كيف شكلها؟ 

كيفية التخلص منها ؟

فيه طرق كثيرة للتخلص منها زي المعالجة عند أخصائية بشرة 
أو تنظيف البشرة عند المشاغل و الصالونات 

و هذي أفضل طريقة عشان تضمني إزالتها %100
بس مشكلتها إنها مؤلمة جدا و أحيانا تكون مكلفة 

و فيه الوصفات المنزلية و أغلبها غير نافعة ما عدا اللي تكون بإستخدام 
أجهزة معينة 

أما الحل اللي جايبته لكم هو سهل جدا و ما ياخذ معك نص ساعة الا تخلصتي منها 

الحل هو 

قناع الفحم الياباني 


هو عبارة عن قناع لونه أسود يحتوي على مستخلص الفحم و يساعدك بالتخلص من  
الرؤوس السوداء بسرعة و سهولة و بدون ألم و من الممكن استخدامه على الوجه كاملا 
أو على الأماكن المحتاجة فقط 

مكان الشراء 

محل دايسو الياباني في مجمع دارين مول بالدمام 

السعر 

 ما أتذكر كم كان بالضبط بس كان أكيد أقل من 15 ريال 

تجربتي 

أول شي أنا بشرتي جافة و عندي رؤوس بسيطة في مقدمة الأنف 

أول خطوة هي إنك تغسلي بشرتك بالغسول حقك و بعدين يفضل إنك تعرضي وجهك لحمام بخار عشان تفتحي المسام عدل

بعد 10 دقائق بتكون بشرتك مستعدة لإستقبال المنتج 

تاخذي كمية بصبعك و تمديه على أنفك و لازم تكون طبقة لأنه 
الماسك يتقشر يعني ما يحتاج غسيل 

يكون التوزيع بهالشكل 

بعد ما تخلصي التوزيع و تحسي إنه فيه كمية مناسبه على أنفك 

خليه لحد ما ينشف يعني قرابة الـ15-20 دقيقة 

إذا تأكدتي إنه نشف تماما يجي وقت التقشير 

لازم تشيليه من تحت لفوق يعني من مقدمة الأنف لحد جسر الأنف 

هذا الجزء اللي يعور شوي بس ألمه ما يقارن بألم ازالته بالمشغل 

أول ما تشيليه بتشوفي خشمك أحمر شوي بس هذا طبيعي 
كم دقيقة و يرجع طبيعي 

النتيجة 

  شوفي النتيجة كيف ، أغلب الرؤوس إنشالت مع الماسك بكل سهوله 

أنا لاحظت إنه حتى القشور اللي حوالين الأنف إنشالت بعد 

و صار خشمي ناااااااعم و نظيف حتى الفاونديشن صار ينحط بشكل أسهل 

 و جربته على أختي الصغيره اللي عمرها 14 سنة و بشرتها دهنية
و نفس النتائج الحلوة 

يعني يناسب جميع الأعمار و أنواع البشرة 

جدا أنصح فيه خصوصا لو استخدمتيه كل أسبوعين مرة أتوقع النتائج بتكون مرضية جدا

خصوصا بالنسبة لسعره البسيط 

تنويه 

و أنا أبحث عن المنتج قبل ما اشتريه شفت تحذيرات أنه المفروض ما يلمس الأماكن اللي فيها شعر مثل الحواجب لأنه ممكن يشيل الشعر فانتبهي و انتي تمديه


 :)  أتمنى تجربوه و تعطوني رأيكم فيه بالكومنتات

لا تنسي تتابعي المدونة على حساباتها في السوشل ميديا 
الموجوده فوق على يمين المدونة  

 و إذا حبيتي البوست لا تنسي تشاركيه مع أخواتك و صاحباتك 



 All love 
Ru.