FOOD | وصفة سلطة المكرونة بالخضار بطريقة صحية و لذيذة~

السلام عليكم و رحمة الله و بركاته

كيفكم يا مزز؟ إن شاء الله تمام

اليوم راجعة لكم بوصفة صحية و لذيذة زي ما قرأتوا بالعنوان

سلطة المكرونه تقريبا صحن حاضر بكل جمعاتنا و سفرنا

و عادة يكون طبق ثقيل و دسم بسبب الصلصلة اللي تزينه و تعطيه طعمه اللذيذ

بس بعلمكم على صلصلة صحية و سهله بتخليك تستمعين بهالطبق بدون و لا ذرة ذنب

نبدأ بالمقادير

(طبعا كل شي بالتقدير على حسب العدد اللي بتقدميه له ، أنا سويت كمية لجمعة بنات تقريبا سبعة)

مكرونة بالشكل اللي تحبيه أنا استخدمت الأقواس لأنها تتشرب الصلصلة أكثر

حبتين خيار

حبتين جزر

ذرة معلبة

فاصوليا حمراء معلبة

حمص حبوب معلب

زيتون أسود شرايح

مقادير الصلصلة

علبتين زبادي قليل الدسم

عصير ليمونه

ملعقة مايونيز و ممكن تستغني عنها

أربع فصوص ثوم

ملح \ كمون \ فلفل أسود \ أوريغانو

شوية خل إذا عندك

الطريقة

أول شي نسلق المكرونه حسب الإرشادات اللي عالعلبة في ماي فيه شوية ملح و زيت 

زيتون ، أنا سلقت نص كيسة المكرونه

على ما تجهز المكرونة نقطع الخيار و الجزر لمكعبات صغيرة

و نصفي المعلبات كلها بمصفاية و نغسلها بالماي عشان نتخلص من المواد الحافظة

نجيب خلاط أو محضرة طعام و نضيف فيها كل مكونات الصلصلة و نخلطها و بكذا جهزت الصلصلة

أول ما تخلص المكرونه نصفيها و نغسلها بماي بارد عشان توقف تطبخ و ما تلصق ببعض

في زبدية كبيرة نضيف المكرونة و المعلبات و الصلصلة و نخلطهم بشويش عشان ما تنهرس المكونات

و حطيها بالثلاجة لمدة ساعة تقريبا عشان تمتص الصلصلة عدل و تطلع لذتها

إذا ما كنتي بتقدمي المكرونة بنفس اليوم فيفضل تخلي الصلصة لين قبل ما تقدميها بكم ساعة عشان ما تصير السلطة طرية بزيادة

و بالعافية

شاركوني تطبيقاتكم على انستغرام\ تويتر المدونة 

الموجوده فوق على يمين الصفحة

إذا حبيتي البوست لا تنسي تشاركيه مع أخواتك و صاحباتك

لا تنسي تتابعي المدونة على حساباتها في السوشل ميديا

المدونة

All love

Ru.