29 April 2017

REVIEW | تجربتي مع قلم الكحل السائل من "مكياجي"





السلام عليكم و رحمة الله و بركاته 
كيفكم يا مزز؟ إن شاء الله تمام 

حبيت أشارككم اليوم بتجربتي مع قلم الكحل السائل من ماركة مكياجي 

أنا من عرفت نفسي و أنا أستخدم كحل ريميل السائل 
حتى كان من ضمن مشتريات الميك اب هنا

 بس مؤخرا كنت رايحة لمناسبة و من سوء حظي اخترب الايلاينر و ما كان عندي المنتج

فاستعرت كحل مكياجي من أختي

للأمانة أنا مش من محبي ماركة مكياجي و كنت دائما أشوفها ماركة بايخة و منتجاتها سيئة 

و استخدمت الكحل على مضض و انا أبدا مو حابته

بعدها رجعت البيت و شفت إنه الايلاينر لا زال بنفس السواد و ثاااابت 

و كأني بديت أحبه 😉

بس قلت خل أجربه مرة بعد 

و جربته مره ثانية بالجامعه تقريبا 7 ساعات و لازال ثابت 👍

عجبني إنه صاير بشكل قلم فصاير جدا سهل ترسمي به الكات ايز 
و مناسب جدا للمبتدئات 

و سواده فاحم جدا 



متوفر في كل محلات مكياجي و مش متأكده من سعره بس عادة أسعار مكياجي في متناول اليد 


لا تنسي تتابعي المدونة على حساباتها في السوشل ميديا 
الموجوده فوق على يمين الصفحة  

إذا حبيتي البوست شاركيه مع أخواتك و صاحباتك

All love 
Ru.
Read More »

14 March 2017

FOOD | وصفة الباستا بالصلصة الوردية pink sauce pasta


السلام عليكم و رحمة الله و بركاته 

كيفكم يا مزز؟ إن شاء تمام 

إذا شيكتوا على البوست السابق بتعرفوا إني قبل شهرين جبت مولودتي الأولى 👶💗

و طبعا مع الحمل و الولادة زاد وزني حبتين فلازم نرجع على الحمية و نتدارك الوضع 

المهم

وصفتنا اليوم أخذتها من اكاونت انستجرام أحبه حييييل 

اسمها خلود و هذا حسابها بالانستجرام

@kholoudabouzid


ما شاء الله حسابها قمة في الترتيب و تصويرها يفتح النفس

الوصفة زي ما شفتوا بالعنوان إسمها 

المكرونة بالصلصة الوردية 

جدا لذيذة و سهلة و صحية و مكوناتها رخيصة زي ما عودتكم







المقادير

( كوب مكرونة أي شكل تفضليه  و يفضل تكون مكرونة سمراء (أنا أستخدمت أقلام

نص كوب بروكولي مقطع صغار

نص كوب زهرة أو قرنبيط أبيض مقطع صغار

كوبين حليب قليل الدسم

ثلاث ملاعق دقيق و يفضل بر

ملعقتين طعام معجون طماطم

ملح\فلفل أسود

ثوم مفروم ناعم


الوصفة

في قدر حجمه مناسب ضيفي ماي و شوية ملح و خليه يغلي

غسلي الخضار و ضيفيهم للماي المغلي و خليهم يسلقوا خمس دقائق

شيكي على مستوى نضجهم عن طريق غرس سكينة في حبة من كلا النوعين لحد ما تمر بسهولة
أنا خليتهم شوية قاسيين

شيلي الخضار من القدر و حطيهم في صحن و صبي عليهم ماي بحرارة الغرفة أو بارد
عشان يوقفوا طبخ

ضيفي الباستا للماي المغلي اللي سلقتي فيه الخضار و اطبخيها حسب الارشادات المذكورة على علبتها

على ما تطبخ الباستا نسوي الصلصة

في قدر وسط نضيف الحليب + الدقيق + معجون الطماطم + الثوم + البهارات
و حركيهم لحد ما يثخن المزيج بيصير قوامه مثل صلصة البشاميل

صفي الباستا من الماي و ضيفي عليها الخضار و الصلصة و اخلطيهم بشويش لحد ما تمتزج المكونات

💜💙و قدميها و رشي على وجهها شوية جبن موزاريلا و بالعافية

إذا حابة تعززي القيمة الغذائية ممكن تضيفي أنواع خضار ثانية أو تضيفي بروتين زي الدجاج
بس حاولي تكون السعرات ضمن احتياجك

الكمية كاملة بتسوي لك أربع حصص

و هذا جدول القيم الغذائية للكمية كاملة


و هذي قيم الحصة الوحدة تقريبا ربع الكمية 



لا تنسي تتابعي المدونة على حساباتها في السوشل ميديا 
الموجوده فوق على يمين الصفحة  

إذا حبيتي البوست شاركيه مع أخواتك و صاحباتك

All love 
Ru.




Read More »

27 February 2017

أمومة | تجهيزاتي اللي استفدت منها كثير

السلام عليكم و رحمة الله و بركاته
كيفكم يا مزز؟ إن شاء الله تمام

و أخيرا رجعت للتدوين بعد انقطاع ثلاثة شهور تقريبا
الحمدلله خلال هالإجازة البسيطة أنجزت أشياء كثيرة و أهمها
إني تخرجت من الجامعة و حصلت على وثيقتي

و الأهم من كذا إني و بفضل من الله صرت أم لأول مرة
في ليلة رأس السنه جبت بنتي حبيبتي "رقية "
و هي اللي أشغلتني عن المدونة بس لا تخافوا راجعة لكم بتدوينات جميله و أفكار جديدة
و إن شاء الله بنرجع لروتين النشر المعتاد



طبعا زي ما تعرفوا أنا فتحت المدونة عشان أشارككم بحياتي و إهتماماتي
و بما إن الأمومة صارت جزء لا يتجزأ مني فكان واجب إني أضيف شي بالمدونة عنها
نفيد و نستفيد من تجاربنا و تجارب غيرنا
و هذا بيكون أول بوست في سلسلة الأمومة الجديدة

هالمرة حبيت أشارككم بالتجهيزات اللي شريتها و صدق  استفدت منها
أول ما بدأت أجهز لبنتي دورت قائمة بالأشياء اللي لازم أشتريها 
و الأغلبية ما ذكروا الأشياء اللي بقولها 


نبدأ أول شي





صابون غسيل الرضاعات السائل من pigeon





هذا الصابون جاء هدية مع رضاعات بنتي
قبل كنت أستخدم صابون فيري عشان أنظف الرضاعات و كان مزعج مرة
لأنه يطلع رغوة كثير و ما تضمني إنه راح مع الماي
فكنت أظل فترة طويلة و أنا أغسل الرضعات عشان أتأكد إنها نظفت

لما جربت هذا الصابون عجبني كثير
أول شي ينظف و يعقم و ما يطلع رغوة

و بس يحتاج خمس ثواني تحت الماء الجاري عشان يروح
و آمن جدا عالأطفال و ممكن تستخدميه على الفواكه و الخضار أو الألعاب

متوفر في الصيدليات ب25 ريال تقريبا

مخدة الرضاعة




حرفيا ما أدري ايش كنت بسوي من دونها
هي مخدة تجي على شكل حرف C

تحطينها حوالين خصرك و تسدحي البيبي عليها بحيث يكون بمستوى صدرك
فيسهل عليه الرضاعة و يصير وزنه كله عالمخدة فما يتعور ظهرك

جدا ممتازه للرضاعة الطبيعية خصوصا للي أول مره تجرب
أما الرضاعة الصناعية ما أتوقع تستفيد منها كثير

و الحلو فيها انه ممكن تستخدميها كمخدة للأم
أو تحطيها حوالين الطفل اللي تو يتعلم يجلس 
عشان لو طاح يكون حوله شي لين و ما يتعور

أخذتها من سنتر بوينت أيام التخفيضات


كانت ب175 ريال و أخذتها بعد التخفيض ب50 ريال




شنطة محترمة لأغراض البيبي






مهم جدا تستثمري في شنطة ذات جودة عالية عشان أغراض البيبي

اختاري وحده من ماركة معروفة و تكون متينة و قوية و فيها جيوب كثير عشان تتحمل
و يكون حجمها كبير شوي بحيث انها تشيل أغراضك كلها
من ملابس و اغراض تبديل الحفاضة و أكل و و و

أنا حقتي نفس اللي بالصورة أخذتها من سنتربوينت و كانت أغلى من باقي الشنط
تقريبا سعرها 200-230  ريال

حبيتها لأنها واقفة و فيها جيوب كثيرة و السير حقها عريض
فيتوزع الثقل عليه بشكل متساوي


السرير المحمول






أخذت هذا السرير لأنه لما كنت في فترة النفاس ببيت أهلي
كانوا كلهم يقعدوا بالصالة و أكون أنا لحالي بغرفتي فأطفش
و صعبة أخلي بنتي لحالها بالغرفة

فشريت سرير متنقل من محل سابل بالخبر
تقريبا ب79 ريال

يجي مثل السلة و له حمالات على جنب تقدري تشيليه معك أي مكان
و فيه منه أشكال كثيرة و متوفر من ماركات كثير

ممكن زيي تاخذي واحد رخيص و بسيط
و ممكن تاخذي واحد غالي و محترم

أنا أخذته بس تمشية حال لحد ما أخلص النفاس و أرجع بيتنا
بس للأمانه اللي شريته أبدا ما عجبني

لأنه رخيص مو محشي اسفنج كثير فحسيته شوي قاسي على ظهر بنتي
و مع الاستخدام زي اللي ماعت جوانبه

بس لو أخذتي واحد من ماركة كويسة أتوقع بيطول معك



هذي هي الأشياء اللي حسيت إني جد جد استفدت منها و ما ندمت إني شريتها
و أنصح كل حامل تجهز إنه تجيب منها

طبيعي انك تشتري أشياء و ما تعجبك هذي هي حلاوة التجربة عشان المرة الجاية 
تعرفي ايش تصرفي فلوسك عليه

بس حلوة الوحدة تبحث قبل تشتري عشان تضمن جودة المشتريات




أتمنى تكونوا استفدتوا من تجربتي وإذا كان عندك اقتراحات ثانية اتركيها بالكومنت عشان نفيد بعض

لا تنسي تتابعي المدونة على حساباتها في السوشل ميديا
الموجوده فوق على يمين الصفحة

إذا حبيتي البوست شاركيه مع أخواتك و صاحباتك
Sharing is caring~

All love
Ru.


Read More »

20 November 2016

FOOD | شاي \ حليب كرك على أصوله



السلام عليكم و رحمة الله و بركاته
كيفكم يا مزز؟ إن شاء الله تمام

بما إنه الجو قام يتعدل و كثرت طلعات البر و الكورنيش
حبيت أشارككم بمشروب شتوي ممتاز
اللي هو حليب الكرك

سهل و بسيط و يدفي مررره
أنا إذا شربته أحس إني لابسة فروة

نبدأ

المقادير لكوب واحد

نص كاسة ماء
نص كاسة حليب أبيض انا استخدم المراعي قليل الدسم
سكر أو محلي صناعي حسب الرغبة
2 كيس شاي
شوية هيل
شوية مسمار (قرنفل)
عودين قرفة (دارسين)
رشة فلفل أسود

ممكن تضيفي زنجبيل شرايح أو مفروم لو حابة بس أنا أحسه يخلي الحليب لاذع بزيادة فما استخدمه

الطريقة

ضيفي الماء و أكياس الشاي في إبريق بدون غطاء عشان تشوفي كل شي 
 و خليه لين ما يبدأ يغلي بكذا بتضمنينإنه الشاي يبرز كل نكهته  
   

طبعا بيقلب لون الماي أحمر


ضيفي عليه باقي المكونات كلها ما عدا السكر \ المحلي الصناعي
و خليها تغلي

بعد فتره بيغلي الحليب و بيبدأ يفور لفوق إنتي بس تشوفيه بدأ يرتفع وخريه عن النار عشان لا يفيض برا الإبريق

و بس يهدأ ( يعني بعد عشر ثواني كذا) رجعيه على النار و كرري الحركة ثلاث - أربع مرات

يعني خليه يفور و وخريه لين يهدأ بعدين رجعيه و هكذا
و بكذا يكون صار جاهز بس صفيه من البهارات و أكياس الشاي

و الحين صار جاهز للتقديم

لا تنسي تحطي السكر على جنب عشان كل واحد يحط على حسب اللي يناسبه

و صحة و هنا

💚

لا تنسي تتابعي المدونة على حساباتها في السوشل ميديا
الموجوده فوق على يمين الصفحة 

إذا حبيتي البوست شاركيه مع أخواتك و صاحباتك

All love
Ru.


Read More »

13 November 2016

REVIEW | مقشر الخوخ من st.ives





السلام عليكم و رحمة الله و بركاته
كيفكم يا مزز؟ إن شاء الله تمام

اليوم حبيت أشارككم بتجربتي مع مقشر المشمش الطبيعي من ماركة
St.ives

زي ما قلت لكم ببوستات سابقة أنا بشرتي جافة و تحتاج عناية دائمة عشان ما يطلع فيها قشور

فأحتاج إني أقشرها على الأقل مرة أسبوعيا عشان تظل ناعمة و نظيفة



استخدمت مقشرات من ماركات كثيرة بس هذا الوحيد اللي أبهرني
خصوصا كونه طبيعي مئة بالمئة و خالي من أي مواد كيميائية



طبعا هذي الماركة البريطانية جدا معروفة و منتجاتها تقييمها عالي سواء غسول أو مقشر و غيره
و كثير يوتيوبرز بشراتهم دهنية و يستخدموها و يمدحوا فيها عشان كذا حبيت أجربها



المقشر هذا بالذات يجي منه أربع أنواع لكل بشرة (عادية – جافة – مخلتطة – دهنية)
النوع اللي استخدمته هالمرة للعادية و اسمه
Fresh skin

قوامه ثقيل شوي و فيه حبيبات صغيرة تقشر لك الوجه بفعالية و نعومة
 بدون ما تأذي البشرة

مكان الشراء

سوبر ماركت الدانوب و متوفر بأغلب الصيدليات

السعر

أخذت الحجم الصغير كتجربة و كان بـ11 ريال
و الكبير مو غالي أتوقع ب23 ريال تقريبا

رأيي بالمنتج

استخدمه بعد الغسول مباشرة مرة بالأسبوع ، أتأكد إنه البشرة مبلولة شوي و أحط كمية بسيطة على أطراف أصابعي

أو فرشاة الوجه و أبدأ أفرك بطريقة دائرية لمدة ثلاث دقائق و بعدين أغسله
و أحط مرطب بعده على طول

جدا ممتاز و أكيد بشتريه مره ثانية خصوصا إنه النتائج رائعة مقارنة بسعره الرخيص
أحب استخدمه قبل المكياج لأنه يشيل القشور و البهتان اللي بالبشرة و يخليها ناعمة فيطلع الأساس مرتب و نظيف



أنصح فيه و بقوة خصوصا للمراهقات اللي تو يبدأوا يعتنوا ببشرتهم لأنه لطيف على البشرة و سعره مناسب لهم
و متوفر بكل مكان


أتمنى يكون عجبك الريفيو
ولو حابة تشوفي ريفيو فرشاة الوجه الموجودة بالصورة بتلاقيه هنا 


لا تنسي تتابعي المدونة على حساباتها في السوشل ميديا
الموجوده فوق على يمين الصفحة

إذا حبيتي البوست شاركيه مع أخواتك و صاحباتك

All love
Ru.





Read More »