MAKEUP| خمسة أخطاء شائعة عند وضع المكياج

السلام عليكم و رحمة الله و بركاته

كيفكم يا مزز؟ ان شاء الله تمام

مؤخرا حضرت مناسبة فيها ما لا يقل عن 150 امرأة

و للأسف إنه كثير منهم كانوا مخربين كشختهم بسبب خطأ بسيط جدا لو عدلته كانت بتطلع أجمل بألف مرة

فطرأت على بالي فكرة هالبوست عشان أخلي أكبر فئة من النساء تستفيد ابتداءا من الكتاكيت اللي توها تبدأ تستخدم المكياج إلى أمهاتنا الأنيقات

1.     وضع الميك اب على بشرة تعبانه

أول و أكبر خطأ ممكن تسويه إنك تحطي الميك أب على بشرة غير مهيأه له لأنها بتشوه منظرك

و بتتتعب بشرتك أكثر و ممكن تسبب حبوب و تجاعيد لو كنتي من النوع الكسول في إزالة المكياج

فالحل إنك تعتني فيها و تجهزي قبل ما تحطي أي منتج عليها ، طبعا أنا أتكلم عن كل أنواع المكياج يعني ترا

حتى الماسكرا و الروج يفرق على وجه نظيف من وجه تعبان فلا تفكري إني أقصد بس مكياج المناسبات

في البدايه استخدمي غسول و مقشر مناسب لنوع بشرتك و لا تنسي الترطيب بعد العناية و قبل ما تحطي

المنتجات على وجهك

الغسول بيتخلص من الأوساخ المتجمعة في المسامات و المقشر بيتخلص من الجلد الميت

فبيمنع الحبوب نوعا ما و بيساعد بشرتك تتوحد و تبين أصفى و أكثر نقاء

2.     استخدام منتج بلون خاطئ

هذي من أكثر المشاكل المنتشرة عند العالم كله و الأغلب يقع فيها حتى المحترفات أحيانا يشتروا لون أفتح أو أغمق بالغلط ، خصوصا عندنا بالسعودية لأنه الغالبيه تشتري بدون ما تجرب بحكم

انها لابسة نقاب فما تقدر ترفعه و تجرب على وجهها على طول

و عشان ما تتورطي و تضيعي فلوسك عالفاضي بعطيك قاعدة ذهبية بالشراء

بالنسبة لكريم الأساس \ الفاونديشن:  دائما جربيه على معصمك لأنه هو الأقرب لبشرة وجهك

فحاولي تاخذي درجة نفس لونك أو أفتح بدرجة بس عشان وجهك ما يبين كنه طحين

 او لو ما لقيتي لونك خذي الدرجة الأفتح منك بدرجة و الأغمق منك بدرجو و ادمجيهم

بالنسبة للكونسيلر\ خافي العيوب : اختاري لون أفتح بدرجة أو درجتين بس عشان يعطي وجهك اضاءه مناسبه 

و ما يقلب رمادي مع الوقت 

لاحظي كيف انه اللون الغلط يشوه المنظر 

3.     الرسم المبالغ فيه للحواجب

هذا أغلب شي تشوفونه بالجامعة لأن البنات تو تبدأ تستخدم المكياج بحكم إنه كان ممنوع بالمدرسة قبل

النقطة الأولى : في بنات كثار يستخدمون قلم أو بودرة سوداء عشان يرسمون و هذا يعطي الوجه

عمر أكبر بكثيرو يشوه المكياج لأنه الكل بيطالع في حواجبك بدل من وجهك

الحل إنك تستخدمي لون مناسب ( ما بدخل في تفاصيل كثيره بس بعطيكم بصفة عامه ) اذا كنتي من

ذوات الشعر الأسود فحاولي تستخدمي لون بني غامق بدال الأسود  عشان تعبي الفراغات بطريقة تبين طبيعية و ما كأنك حاطه شي

اذا كنتي شقراء أو ذات شعر من درجات البني حاولي تستخدمي بني فاتح ، اذا كنتي شقراء لا

تفكري انه لازم يكون حاجبك أشقر بعد ! ترا شكلك بيطلع تحفة !

لاحظي إني ما ذكرت اللون الأسود أبد ! فاللي عندها قلم حواجب أسود فحمه تحرقه جزاها الله خير:)

حتى لو كنتي تصبغي حواجبك بالصالون اطلبي صبغة بنيه اذا كنتي شقراء أو ذات شعر من درجات البني أو لو كنت من ذوات الشعر الأسود زيي ففي حركه كنت  أحب أسويها أيام زمان

أطلب صبغة سوداء و أخليها بس 10 دقايق و أغسلها ، لأنها اذا طولت تطلع غامقة مره و شكلها غبي ، بس 10 دقايق و بتطلع طبيعيه و جدا حلوه

و النقطة الثانية المربع اللي ببداية الحواجب

هذي عاد ضيم ضييم ضيييييييييم  ، اللي تسويها ودي أقولها ليش يبه ؟ من مزعلك ؟

صدقوني تشوه بشكل مو طبيعي ، أنا حاولت أشرح كيف بس أتوقع الفيديو بيكون أفضل بالتعبير

فتفضلوا طريقة سهله و بسيطة  :

4.     الكحل المتعرج

هذي مشكلة تواجه أغلب المبتدئات ، كيف أرسم الايلاينر عدل و يطلع مرتب ؟

أول شي الايلاينر يبيله خفة يد و سرعة في المد و خبره عشان يضبط من أول مره و بتحتاجي تتدربي أكثر من مره عشان تضبطيه على طول

ففي خدعة أستخدمها لما أكون مستعجلة و ما أبي أخرب اللي حطيته سواء شادو أو فاونديشن

الحل  : أجيب تيب \ لزقة \ شريط لاصق و أقص منه قطعتين صغار بطول 10 سم مثلا و أحطهم

في الزاوية الخارجية للعين ، أحطهم في أخر العين و أوصلهم بنهاية حواجبي عشان أضمن أنهم متساويين ، بعدين أرسم بالكحل عادي ، لما أشيل اللصقة بيبين الكحل و كأنه مرسوم بيد خبيره !

( ملاحظه / اللصقه بعدين ما تقصينها حطيها على يدك و شيليها عشان يخف الغراء اللي فيها و ما تعورك اذا جيتي تشيلينها من عند عينك بعدين )

هذي صوره تساعدك :

5.     الروج السايح أو ما يعرف بالbleeding lipstick

أخر خطأ بتكلم عنه هو الروج السايح و هالمشكلة تواجهنا أغلب الوقت مع الأرواج الحمراء و الغامقه

فجأه تلاقين حوالين الشفايف كله تعبى لون أحمر كنك مضروبه !

الحل : نطبطب بالكونسيلر على أطراف الشفايف عشان ندمجها بباقي الوجه ، بعدين نجيب محدد نفس لون الروج و نرسم الشفايف ، انتبهي لا تطلعين برا الخط و اذا غلطتي امسحي بمنديل و عيدي

الكونسيلر و كملي رسم و إذا خلصتي حطي الروج

كذا بتضمنين إنه بيظل أطول وقت ممكن و يكون شكله حلو و نظيف

أتمنى إنكم استفدتوا من الحلول اللي ذكرتها و انكم تستخدموها عشان تحسنوا طلتكم أكثر

لا تنسي تتابعي المدونه على حساباتها المذكورة فوق على يمين المدونه

All love

Ru.