السلام عليكم و رحمة الله و بركاته
كيفكم يا مزز ؟ إن شاء الله تمام
اليوم حبيت أتكلم معاكم عن أكثر قطعة مهمة في دولاب المرأة السعودية
"اللي هي "العباية
أغلب النساء في المملكة يلبسون العباية و الحجاب لدرجة صار زي رسمي لنا
حتى الأجانب يعرفوا إننا عرب من لبسنا المميز
و للأسف رغم إنه هو المظهر الخارجي للمرأة إلا إنه فيه بعض النساء يلبسوها بشكل عجيب
تلاقيها تمشي بالشارع مبهدلة و العباية غير نظيفة و غير مكوية
!و الله أستغرب منهم بشكل
يعني إنتي أنثى مفطورة على حب الجمال و النظافة فليش تسوي بنفسك كذا ؟
خصوصا إنه احنا نلبسها بكل مكان الدوام , السوق , الزيارات
فعشان كذا حبيت أشاركك بطرق الإهتمام بالعباية
تساعدك تحافظي على عبايتك مهندمة و مرتبة
:الموضوع ينقسم لقسمين
شراء العباية و العناية فيها
أول شي نبدأ فيه هو
كيف أختار العباية المناسبة؟
أهم شي تراعيه بالعباية إنها موجودة عشان تستر جسمك و مش مجرد منظر
سواء كانت عباية كتف أو رأس
فإختاري العباية اللي ما تكون مره لاصقة بجسمك عشان ما تكون مخالفة للشرع
يعني مثلا خذي مقاس اكبر برقم من مقاس ملابسك العادية
(ما راح أدخل بتفاصيل طويلة كل وحدة و اللي تشوفه صح)
و يكون طولها مناسب لطولك لأنها لو كانت أقصر أو أطول من اللازم بتبين مبهدلة
و العباية الطويلة أصلا بتنعدم بسرعة لأنها بتمسح الأرض و إنتي تمشين
يعني شوفي في الصورة الجاية شلون صاير طول العباية أقصر من حذائها بشيء بسيط
كل ما كانت العباية طولها و مقاسها مناسب كل ما طولت معاك
أحسن مكان أشتري منه العباية ؟
في نظري ما فيه شي إسمه أحسن مكان ، ممكن خياط في داعوس
يكون أحسن من محل ماركة في أكبر مجمع
كله يعتمد على جودة القماش و التفصيل و ميزانيتك
أنا عن نفسي ما أشتري عباياتي إلا من سوق الحب
(سوق كبير معروف في مدينة الدمام)
فيه هناك خياط محله صغير و مشكنم
بس ما شاء الله عليه خياطته ممتازه
!و أسعاره جدا بسيطه يعني العبايه ما توصل ميتين ريال
بس ممكن ناس ما تحب تاخذ إلا من ماركات معينة
مثل بدون إسم
فكل وحده على حسب ميزانيتها
أفضل قماش للعباية ؟
الأقمشة أنواع كثيره و أنا الصراحة ما أعرف فيها
بس من و أنا صغيرة و أمي ما تشتري لي إلا نوعين
يا سولون كوري\ياباني
أو
فرسان
السولون يجيك قماش جودته عالية جدا و تتحمل الغسيل بالغسالة
و يكون مطفي ما فيه لمعة
أما الفرسان فيكون قماس فيه لمعة معينه
و ميزته إنه ثقيل شوي و يتحمل الشغل
حاولت ألاقي له صور بس هو تقريبا زي كذا
عيب القماش الفرسان إنه بسرعة ينسل منه الخيط
يعني أي شي يمسك بعبايتك ممكن يقطعها
و إنه يتعفس بسرعه فيباله وحده مهتمه
أنا من كبرت و صرت أشتري لنفسي عبايتي
و أنا أختار السولون
رغم إنه أغلى بس يستاهل كل ريال
كم عباية المفروض يكون عندي ؟
أنا أفضل يكون عندك عبايتين للإستخدام اليومي
عشان يكون عندك إحتياط في حالة الطوارىء
أنا عن نفسي عندي 3 عبايات
وحدة للإستخدام اليومي و وحده للدوام و وحدة ملونه للأعراس و المناسبات
كم المفروض تظل عندي العباية قبل التغيير ؟
أنا أفضل تغيرين العباية كل ست شهور إلى سنة
لأنه ممكن تنعدم لو إستخدمتيها كل يوم و مع الغسيل و الجو اللطيف
و برضو الوحدة ممكن تطول و يتغير وزنها فالأسلم تغيريها كل كم شهر إلى سنة
أنا أشتري لي عبايتين في محرم اللي هو بداية السنة
و أغيرهم في رمضان عشان العيد و عشان يكملوا بقية السنة معاي
ثاني شي هو العناية بعد الشراء
كيف أغسل العباية ؟
غسيل العباية تنطبق عليه جميع قوانين غسل الملابس الداكنة
الملابس السوداء حلاتها لما تكون محافظة على لونها الأسود الغامق مو لما تبهت
:ففيه عدة نصائح تتبعيها عند الغسيل
لا تغسليها بشكل متكرر
حاولي تغسلي العباية مرة - مرتين كل أسبوع عشان لا تبهت و هنا تجي فايدة إنه يكون عندك أكثر من عباية
حاولي تغسليها لحالها أو مع ملابس مقاربة للونها
لأنه لو غسلتيها مع ملابس فاتحة ، الصبغة الغامقة بتنتقل لملابسك و بتغمقها
و الصبغة الفاتحة بتنتقل لعبايتك و بتبهت لونها
حاولي تغسليها بالماي البارد
لأنه الماي الحار يساعد الصبغة على إنها تطلع من الملابس
بس لا تستخدمي ماي بارد مره لإنه بيقلل من فعالية شامبو العبايات
استخدمي صابون الغسيل المخصص للعبايات
فيه أنواع كثيره موجوده بالسوق و بأسعار متفاوته ، أنا عن نفسي أستخدم برسيل للعبايات السوداء
هذا الصابون مخصص عشان يحافظ على صبغة العباية في مكانها و يعزز لونها
حاولي ما تستخدمي النشافه
و انا صغيرة أمي كانت دايما أغسل مريول المدرسة و عبايتي بيدي
و لما كبرت عرفت إنه لهم أثر سيء جدا على العباية
و كانت تخليني أعلق عبايتي بالطول بدورة المياه عشان تنشف
لأنه الشمس مبيض طبيعي و بتخلي ثيابك رمادية مع الوقت
كيف أحافظ على لونها قاتم ؟
فيه خدعة أكتشفتها قبل فترة و تناسب كل الملابس السوداء مو بس العباية
و هي إنك تنقعي الملابس بطشت فيه ماي بارد و نص كوب ملح طعام
خليهم عشر دقايق و اغسليهم
طبعا هالكلام في أول غسلة بعد الشراء
لأنه الملح يثبت اللون بشكل كبير و يحافظ على سواد ملابسك لا يروح
و في الغسلات اللي بعدها بس ضيفي الملح على الثياب في الغساله
حطيه في حوض الغساله مش في فتحة الصابون عشان لا يسدها
بعد ما نشفت العباية و عشان يكمل الترتيب
استخدمي المكواة عشان تتخلصين من الكفسات اللي كونها الغسيل
أنا أستخدم مكواة بخار زي هذي
جدا سهلة الإستخدام و تخلصك من كل الطعجات و الكفسات بسهولة
أول كنت أحسبها غالية و كنت رافضه تماما إني اشتريها
(كنت احسبها بالف و شوي)
بس لما تعبت من كثر ما أعلق الثياب لساعات و لسه تبان معفسة
قررت إني أشتريها
أخرتها طلعت بأقل من 300 ريال
أنصحك جد جد إنك تاخذيها اذا ما عندك وحدة لأنه بتسهل عليك حياتك
أي قميص أي عباية أي شيء
بتكويه في خمس دقايق و إنتي خالصة
و آخر نصيحة
هي إنك تعلقيها في مكان مناسب لها عشان لا تتعفس
و إذا رحتي مكان و احتجتي تفصيخها لا تلفيها و ترميها لأنه بتطلع معفسه و بتتفشلين قدام الناس
بس اطويها و خليها على جنب و بكذا بتظل مرتبه
أتمنى إستفدتي من النصايح اللي عندي
يمكن طولت عليك بس صدقيني لو جربتيهم بتفرق معاك عباتك كثيير
إذا عندك نصيحة غير اللي ذكرتها يا ريت تشاركيني فيها تحت بالتعليقات
أو على حسابات المدونة الموجودة فوق على اليمين
و مرة وحدة ضيفي المدونة عشان تنضمي لعائلتنا الجميلة و توصلك الأخبار أول بأول
لا تنسي تشاركي الموضوع إذا عجبك مع خواتك و صديقاتك عشان يتستفيدوا
أشوفك بالبوست الجاي
All love
Ru.
No comments:
Post a Comment