أمومة | وجبة طفلتي الأولى و المفضلة !

السلام عليكم و رحمة الله و بركاته

كيفكم بنات ؟ ان شاء الله بخير

بوست اليوم للمامات الجدد مثلي

إذا ما كنتوا تعرفوا فأنا سابقا شاركتكم بخبر حلو مره في بوست سابق هنا

اللي هو انه في يناير 2017 صرت أم لأميرة جميلة إسمها رقية

حبيبة قلبي الشهر هذا كملت الستة أشهر و الحمدلله

و بدأت مرحلة الأكل

طبعا أنا بدأت معاها بالأكل من قبل تقريبا من الشهر الرابع

لكن  كنت أعطيها مرتين بالأسبوع بس

و في آخر زيارة للتطعيم الدكتورة عطتني الضوء الأخضر إني أبدأ

أعطيها خضار و سيريلاك

فحبيت أساعد المامات الجدد و أعلمهم الوصفة اللي اتبعتها

و الحمدلله جدا حبتها و ما سببت لها مشاكل

بس معلومة بسيطة قبل ما نبدأ

كل طفل يختلف عن الثاني و اللي يناسب بنتي مش معناه يناسب طفلك

فقبل تجربة كل شيء تأكدي من أنه طفلك جاهز لهالمرحلة و انه متقبل لها

لأنك لو استعجلتي ممكن تسببي له مشاكل صحية مثل الامساك

و ممكن مشاكل نفسية فيصير يكره الأكل و ما يطلبه

مثلا أنا جربت من قبل منتج بالسوق أبدا ما ناسبها

و حسيتها ابدا مش مرتاحةو هي تاكله فوقفت قبل ما نوصل نص العلبة

بس للأسف سبب لها اسهال شديد تحول لطفح و تسلخات

فأنتي انتبهي للعلامات اللي يعطيك اياها طفلك لو حسيتي انه مو حاب الاكلة

عادي يفداه ارميها و سوي لي شي جديد

و الحين نبدأ

وصفة اليوم عبارة عن مهروس البطاطا و الجزر

جدا لذيذ لدرجة إني أحيانا أسرق لي ملعقة أو ثنتين و أنا أعطيها

المقادير تقول

حبة جزر و حبة بطاطس

الطريقة

أغسلي الخضار تحت ماي جاري لمدة ثلاثين ثانية عشان تتأكدي من نظافتها من الأتربة

قشري الجزر و البطاطس و قطعيها مكعبات بحجم متوسط و حاولي تكون متساوية 

عشان تطبخ بنفس الوقت

في قدر بحجم مناسب ضيفي ماء معلب (صحة\بيذر) و خليه يغلي

السبب انه الماء اللي بالخزان ممكن تتجمع فيه اوساخ فالأفضل استعمال الماء المعلب

لما يغلي الماء ضيفي الخضار المقطعة و خليها تطبخ على نار متوسطة

وقت السلق حسب حجم المكعبات بس عادة تاخذ عشرين دقيقة

تعرفي إنها جاهزة إذا غرزتي فيها شوكة و دخلتها بسهولة و بدون مقاومة

بعدين باستخدام خلاط أو محضرة طعام

ضيفي الخضار المسلوقة في الوعاء و ضيفي عليها شوي بس من ماء السلق و اخلطي

 

حاولي تخليها كثيفة شوي يعني مو تخلطيها تصير ناعمة كأنها ماي

اذا حسيتيه مو راضي ينخلط عدل ضيفي ماي شوي بعد

زي في الصورة ما رضى ينخلط أكثر بس مع الماي كمل عادي ووصل للكثافة المطلوبة

هذي خطوة أنا أسويها مو شرط تتبعيها

و هي اني اضيف شوية ملح و كمون للخليط من باب التنكيه

أعرف إنه كثير ناس يقولوا انه ما يصلح و و و

بس أنا جربته و ناسب بنتي و للأمانه طعم الخضار المسلوقة مش حلو أبدا فلازم نكهة

طبعا أحط نتفة مره مو زي أكل الكبار

بعد ما توصل الكثافة المطلوبة أخليها تبرد شوي و أحطها بحافظة الطعام

أنا أستخدم علب زجاج أفضل من البلاستيك عشان لو بسخنها أسهل لي

و للأمانة ما شريت لها حافظات

استخدمت علب صلصة الطماطم بعد تنظيفها و ماشية معاي عادي

أنا بالنسبة لي الكمية سوت وجبتين ليومين

بس أحطها بالحافظة و علطول عالثلاجة

تظل صالحة للاستخدام من يومين إلى ثلاثة أيام

وقت الحاجة بس حطيها بالمايكرويف 20 ثانية

أو طلعيها قبل بفترة عشان تصير بدرجة حرارة الغرفة

جدا سهلة هالوجبة و مفيدة للأطفال بدل ما يعتمدوا على الأشياء المصنعة و المحفوظة

جربوا الطريقة و خبروني إذا عجبت الأمامير

لا تنسي تتابعي المدونة على حساباتها في السوشل ميديا

الموجوده فوق على يمين الصفحة

إذا حبيتي البوست شاركيه مع أخواتك و صاحباتك

sharing is caring ~

All love

Ru.