REVIEW | تجربتي مع كريم باراشوت سيكرتس للشعر التالف و المتقصف

السلام عليكم و رحمة الله و بركاته

كيفكم يا مزز ؟ إن شاء الله تمام

بوست اليوم يتكلم عن العناية بالشعر

كلنا نعاني من الشعر التعبان أو المتقصف أو غير الصحي

يعني قليل جدا اللي يكون شعرها صحي جدا و لماع

طبعا تلف الشعر يحصل بسبب أشياء كثيرة

كثرة صبغ أو غسل الشعر و على فترات متقاربة ، كثرة استخدام الحرارة لتصفيف الشعر

عدم تناول الأكل الصحي مما يفقد الشعر الكثير من البروتينات المهمة

و أهم نقطة :

سوء التعامل مع الشعر !

في بنات لو تشوفينها و هي تمشط شعرها تحسيها تتهاوش معاه

تستخدم أسواء أنواع الأمشاط و ما تستخدم له لا زيت و لا كريم

و برضو ما تقص أطرافه أبدا فيوصل التلف لين أعلى الرأس

و تشد شعرها و تمعط فيه و هو مبلول

و بعدين تستغرب ليش شعرها يتساقط و يتقطع !

الشعر مثله مثل أي شيء بالحياة يحتاج لعناية عشان يكون صحي و حلو

و أنا من الناس اللي ما أحب أصرف كثير على منتجات العناية ، يعني أفضل إني أستخدم

المنتجات اللي بالصيدلية للعناية

فقبل فتره ، تقريبا في فصل الشتاء

سحبت على أغلب روتين عنايتي بسبب ظروف معينة

و مع برودة الجو نشف شعري عدل

هو أصلا نوعيته جاف و مع الإهمال جف زيادة و صار من يلمسه المشط يتقطع

و يتقطع قلبي معاه

فقلت خلاص ما بدهاش و اتجهت للصيدلية

أنا باراشوت محفور في ذاكرتي لأنه أمي كانت تستخدمه لشعري و أنا صغيره

فلما دورت عليه لقيت إنه فيه أنواع كثيرة

و أخترت منهم هذا النوع

اسمه الكامل

باراشوت سيكرتس خلطة كريم للشعر : كريم معالجة الشعر التالف و المتقصف

أول شي سويته قصيت الأطراف التالفه بشعري

و شريت لي فرشاة شعر جديدة محترمة و ناعمة على شعري

و صرت أستخدمه بعد كل غسلة شعر أو كل مرة أمشط شعري

يعجبني إنه ريحته حلوة و مقبولة و مش قوية وأنه الشعر يمتصه بسسسرعة يعني ما يدبق أبدا

الحمدلله ما خلصت العلبة الا و شعري صار ممتاز

يعني ما شاء الله في شهر تقريبا رجع ترطيب الشعر و صار أسهل في التمشيط و أحلى في التصفيف

جدا جدا عجبني الكريم خصوصا إنه نتائجه سريعة مقارنة بكريمات من ماركات ثانية

و سعره جدا رخيص مقارنة بحجمه

يعني الحجم الكبير بـ 11 ريال بس !

و متوفر في أغلب الأسواق

أشوفه منتج ممتاز للي ميزانيتها محدودة أو اللي تبي عناية بدون تعقيدات  أتمنى 
تجربوه و تعطوني رايكم

لا تنسي تتابعي المدونة على حساباتها في السوشل ميديا 
الموجوده فوق على يمين المدونة  

إذا حبيتي البوست شاركيه مع أخواتك و صاحباتك

All love 
Ru.

Read More »

HAIR\SKIN CARE| قناع الزبادي للوجه و الشعر

السلام عليكم و رحمة الله و بركاته

كيفكم يا مزز ؟ ان شاء الله تمام

تدوينة اليوم كلها عن الترطيب . مؤخرا الجو بدأ يتحسن بعد ما كان كله هواء بارد و جاف !

و الشتوية هذي كانت صعبه مرة على بشرتي و شعري لأنهم هم بطبيعتهم جافين و مع البرودة زاد الجفاف L

فقررت أعيد الترطيب لها بمساعدة مكون موجود بكل مطبخ و هو >> الزبادي <<

الزبادي أو الروب معروفة فوائده الصحيه للجسم عند أكله لأنه يحتوي على إنزيمات هاضمة و بروتين و كالسيوم و عدة أحماض 

أهمها حمض اللاكتيك اللي تضيفه أغلب الشركات المختصة بالبشرة لمنتجاتها عشان يزيد نسبة الترطيب فيها

فإحنا اليوم بنرجع للأساس و بنستخدم الزبادي على بشرتنا عشان تمتص هالفوائد من المصدر نفسه سواء بوضعه عالبشرة على طول أو عن طريق أكله بوصفة لذيذه زي البوست اللي فات (هنا)

بعلمكم اليوم على طريقتين وحده للبشرة و ووحده للشعر

طريقة ترطيب البشرة

بنحتاج لعلبة زبادي وحده و ما يهم أي نوع ( اذا كانت بشرتك دهنية فيفضل تضيفي ملعقة صغيرة من بهار الكركم المطحون لأنه يساعد على التخلص من الحبوب و آثارها )

أول شي نظفي بشرتك بالغسول حقك عشان تكون البشرة متهيأة للزبادي ، بعدين اخفقي الزبادي بالملعقة و مدي طبقة خفيفه على 

وجهك و حاولي تكون الطبقة متساوية عشان تجف في وقت واحد ، بعدين استني ربع ساعة أو حتى ينشف الزبادي و اغسليه بالماء فقط .

علطول بتلاحظي كيف بشرتك بتبين مترطبة و لينه و فيها نداوة !

طريقة ترطيب الشعر

بتحتاجي من علبة الى ثلاث علب على حسب طول شعرك و نص كوب زيت زيتون

اخلطيهم مع بعض و ضيفيهم على شعر نظيف و استني من 20 الى 30 دقيقة بعدين اشطفي شعرك و بتلاحظي كيف الشعره لينه و لامعة!

الطريقتين من أسهل ما يكون و كلها نص ساعه بالكثير الا و انتي مترطبه و بشرتك موردة  وشعرك سهل التصفيف :)

سواء كان شعرك\بشرتك جافة أو دهنية أو مختلطة لازم تهتمي بها و ترطيبها بقناع بين كل فترة و الثانيه و وصفة اليوم تناسب كل أنواع البشره و كل الميزانيات و الأعمار فمالك عذر ما تجربيها !

جربوا الطريقتين و أعطوني رأيكم سواء بالتعليقات هنا بالمدونة أو بالانستقرام 

(تلاقون حسابات المدونة فوق على يمين الصفحة )

All love

Ru.

Read More »

HAIR CARE| MY FAVORITE YOUTUBER'S PART 2! أفضل قنوات اليوتيوب لتصفيف الشعر

السلام عليكم و رحمة الله و بركاته 

كيفكم يا مزز؟ ان شاء الله تمام

اليوم كتبت لكم جزء ثاني لوحده من أكثر التدوينات مشاهدة على مدونتي اللي هي أفضل قنوات اليوتيوب لتعلم المكياج
(من هنا) 

بس هالمرة بتكلم عن تصفيف الشعر ، كثير منا عندها مناسبه و لأنها ما تعرف شتسوي بشعرها يا تخليه ستريت و الا تفيره و بس و أنا منهم

 و لأنه في ملابس ما يصلح عليها لا كذا و لا كذا فاتجهت لليوتيوب و اكتشفت كم قناه 

حلوه و بتساعدنا كثير يا معشر البنات

ميمي و ليلى من قناه luxy hair ، أختين لطيفاااات و يملكون شركة لكسي هاير لوصلات الشعر، وصلاتهم جدا جدا ممتازه و أغلب اليوتيوبرز يستخدموها 

 مسوين  هالقناه عشان ينزلون ستايلات بسيطه و نعومه تناسب كل أطوال و أنواع الشعر

رابط قناتهم: luxyhair

ني NEE ، اذا شفتيها بتحسين نفسك رجال، رقيقه و لطيييفه لأبعد حد ، قناتها فيها فيديوات ميك اب و تصفيف شعر و عناية بالبشرة  و كلها اشياء بسيطه و نعومة  بس تبين أنيقه في النهايه

رابط قناتها: bebexo

هذي القناه بالذات يبيلها وحده يدها خفيييفه و متمرسه عدل ، ما شاء الله تسريحاتها رهيبه بكل معنى الكلمه و الحلو انها متنوعه يعني شي للدوام شي لأعراس و أنا متأكده بتستفيدي منها

رابط قناتها:

 MakeupWearables Hairstyles

و أخيرا و ليس أخرا قناة ليليث مون ، للأمانه ما أعرفها كثير بس أتذكر من زمان سويت كم تسريحه من عندها و كانت سهله مره و بسرعة سويتها

رابط قناتها: lilithmoon

الحين ما عندك عذر تسوين شعرك ستريت بس xD

all love:

Ru.

Read More »

HAIR CARE| عالجي شعرك الجاف بالبيت

السلام عليكم 

كيفكم يا مزز ؟ ان شاء الله تمام :)

اليوم البوست بيكون عن العناية بالشعر الجاف المتقصف اللي رايح فيها بالعربي .

قبل فتره صبغت شعري و ما عجبني اللون و رحت و صبغته ثانيه و هذا كله خلال شهر و نص ، فشعري راح فيها :(

و حست النت فوق تحت ادور عن شي يرجع الحياه لشعري بما انه 70% من جمال المرأه في شعرها ، و لقيت وصفة منزليه للشعر في احد المنتديات ( للأمانة ما أذكر أي منتدى) و جربتها و النتيجة كانت أكثر من رائعه بالنسبة لأول مره، مكوناتها مره سهله و متوفره في كل بيت و ريحتها مش سيئه أبدا .

انا  نوعية شعري جاف و نوعا ما متقصف من تحت ، مصبوغ مرتين قبل كم شهر و الحمدلله قدرت أرجعه لسابق عهده قبل كل هالخرابيط اللي سويتها .

الوصفه سهله سهله سهله لأبعد الحدود كل اللي راح تحتاجينه هو :

1-علبة زيت زيتون كامله ( الوصفه الأصلية استخدمت زيت الوزير)

2- راس كامل ثوم 

3- بيالة قرنفل مطحون ( المسمار اللي يحطوه مع الرز)

4- علبه لحفظ الخلطة 

الطريقة : 

صبي علبه زيت الزيتون كلها بالعلبة اللي بتحفظي فيها الخليط ، ضيفي فوقه القرنفل المطحون و فوقه ابشري راس الثوم كله ، اخلطيها شوي لين ما تمتزج المكونات و قفلي العلبة .

خليها تنقع لمدة يومين و حركيها بين الفتره و الثانيه بملعقة .

الاستخدام:

حطيها على شعرك مرتين اسبوعيا و خليها لمدة ساعه كامله قبل ما تغسليها.

ملاحظات : 

1- القرنفل ممكن تشتريه مطحون و ممكن انتي تطحينه بالبيت باستخدام قطعة طحن البهارات اللي تجي مع الخلاط.

2- فوائد الخلطه انه الزيت زيتون بيرطب شعرك لأبعد حد و الثوم بيقويه و بيطوله و المسمار المطحون ريحته حلوه فبتطغى على ريحة الاثنين و بتترك شعرك ريحته حلوه.

انا جربت الوصفة مرة وحدة فقط و خلت شعري ناااااعم من اول مرة ! و حسيته مترطب عدل و ريحته كانت حلوه.

اذا عندك  اي وصفه حابه تشاركيها معاي او جربتي هالوصفه و عجبتك او اي استفسار اتركيه لي بالكومنت و اكيد بحب ارد عليك 

all love 

Ru.

Read More »

REVIEW | FIRST IMPRESSION: WELLA PRO SERIES SHAMPOO تجربتي مع شامبو ويلا برو سيريس

السلام عليكم يا جميلات 

كيفكم ؟ إن شاء الله تمام 

بوست اليوم راح يكون عن شامبو ويلا الجديد ( اللي تطلع مريام فارس بدعايته) ، طبعا ويلا نزلت مجموعة جديدة بالأسواق عبارة عن شامبو و بلسم و ماسك للشعر . 

فيه منه عدة أنواع : مجموعة الإصلاح ، مجموعة الترطيب ، مجموعة التحكم في تطاير الشعر ، مجموعة للشعر المصبوغ ، مجموعة للمعان ، و أخيرا مجموعة للتصفيف عبارة عن مثبت شعر و غيره. 

راح أتكلم اليوم عن مجموعة الترطيب بس أول شي بكلمكم عن شعري ، شعري نوعه جاف و فيه تقصفات و انا وحده كسولة و لا أقرب للزيت الا في حالة الطوارئ القصوى .

 قبل هذي المجموعة كنت استخدم شامبو تريسيمي الجديد بالكيراتين مع البلسم ، الشامبو كان يغسل من قلب و يتخلص حتى من الزيت الطبيعي اللي يفرزه الشعر و البلسم يرجع الترطيب بشكل رائع . 

المشكلة انه البلسم خلص قبل الشامبو ، فصرت استخدم الشامبو بس و زاد جفاف شعري بشكل مو طبيعي :( 

صار متطاير و أحسه يتقطع و أنا أمشطه . 

فلما استخدمت شامبو ويلا سوى معجزة بشعري ! 

أول شي هذي صورة الشامبو : 

أسعارهم تقريبا ب18 ريال و بالموقع كاتبين أنه مخصص للشعر الجاف المتطاير ، فأكيد الوصف ناسبني .

أستخدمته مرة وحده بس من شريته  بس عجبني بشكل مو صاحي ، اللي عجبني فيه أنه الشامبو و البلسم ما تحتاجين تخلينهم وقت محدد ، دقيقة و اغسليه .

الشامبو لحاله جددددا مرطب و البلسم مرطب أكثر و أكثر، فأقدر أقولكم أشتروه و أنا أضحك بعد .

بعدها بيوم استشورت شعري و النتيجة كانت خياااااااال فأكيد بظل اشتخدمه.

جربوه و قولوا لي رأيكم =)

لا تنسي تتابعي المدونة على حساباتها في السوشل ميديا 
الموجوده فوق على يمين المدونة  

إذا حبيتي البوست شاركيه مع أخواتك و صاحباتك

All love 
Ru.

Read More »

HAIR CARE| macadamia natural oil تجربتي مع مجموعة زيت المكاديميا

السلام عليكم 

كيفكم يا مزز ؟ ان شاء الله تمام :)

حبيت اليوم أشارككم بتدوينة جديدة عن الشعر ، بما إنه 75% من جمال المرأه ينتج من شعرها فأكيد أكثر شيء تهتم له المرأه هو... شعرها !

من هالمنطلق حبيت أكلمكم عن وحدة من أشهر منتجات العناية بالشعر ألا و هي مجموعة زيوت الماكاديميا الطبيعه أوmacadamia natural oil ، هي مجموعة منتجات تتكون من شامبو و بلسم و قناع و زيت و leave-in conditioner ، و كلها تعتمد على مكون رئيسي و هو زيت جوز الماكاديميا العضوي . هذا الزيت يحتوي على عناصر مرطبة و معالجة بشكل كبير ، أكثر من أي نوع ثاني من المكسرات ، و لأنه يحتوي على الاوميغا 3 فهو سهل الامتصاص و أثاره تبين سريعا على الشعرة.

في منه مجموعتين وحده للعناية و وحدة للتصفيف و اللي بتكلم عنها هي العناية.

مجموعة العناية :

مجموعة التصفيف :

طبعا المجموعة كسرت الدنيا أول ما نزلت و ماظلت بيوتي غورو باليوتيوب ما تكلمت عنها و لو بحثتوا باليوتيوب بتلاقوا ريفيوهات بالهبل عنها ، هل هي تستحق و الا لا ؟ كملو البوست و بتشوفوا :)

مثل ما قلت لكم من قبل أنا شعري جاف و نوعا ما متقصف فلما سمعت عن المجموعة و كمية المدح اللي جا عليها رحت طيران و شريتها ، تقدري تطلبيها اونلاين أو تشتريها من محلات نزيه مثلي ، في المحل عندهم علبه كبيره تجيها فيها كل أصناف المجموعه بحجم صغير  و معاهم مشط من الخشب و سعرها تقريبا 600 ريال.

أنا قبل ما أروح أشتريها دورت بالنت و لقيت أنه أغلب الناس اللي شروا المجموعه كامله قالوا انه الشي الوحيد اللي قرروا يرجعوا يشتروه هو الماسك حق الشعر ، باقي المجموعه حلوه بس في لها بدائل أرخص أما الماسك فهو الأفضل ، فأنا قررت إني أشتري الماسك بس .

يجي بحجمين حجم صغير سعره قرابه 150 ريال و حجم كبير و سعره 180 ريال ( ماكو فرق كبير بالحجم) ، أخذت الحجم الكبير و مع أنه شعري كان طويل نسبيا ظل معاي أربع شهور فأتوقع لو وحده شعرها قصير بينقلب خمر و هي لسه ما خلصته xD

هذا شكله : 

طريقة الأستخدام هي أنك بعد ما تغسلي الشعر بالشامبو ، اغرفي بيدك كمية مناسبة لطول شعرك و إبدأي وزعيها على طول الشعر و ركزي على الأطراف ، في ناس تقول مب زين تحطينه على الجذور بس أنا حطيته و الوضع عادي ، اتركيه لمدة سبع دقايق بس و بعدين اغسليه و بتحسي بالنعومة على طول .

رأيي الأخير : 

من كلام الناس ما أتوقع إني أشتري كامل المجموعه بس الماسك أكيد برجعله ، استشوار شعري صار أسهل و الشعره نفسها مترطبه عالآخر ، أكثر شي حبيته فيه هو إني ما أحتاج أخليه فتره طويله  يعني أحطه و على ما أغسل جسمي و وجهي الا خلص الوقت ، ريحته جددددا جميله  و بتنقلبين فواحه متحركه ، أبدا ما يلبد بالشعر و يتغسل بسرعه ، كسعر ... أحسه شوي غالي بس ما دام نتائجه كذا فأكيد يستاهل.

ملاحظه بسيطه : في ناس قليله جدا ما ناسبها المنتج ، ما أعرف هل هو بسبب سوء استعمال أو سوء تخزين أو ما يناسب نوعية شعرهم :\

أنا عن نفسي كثير حبيته ، اذا كنتي شاريته يا ريت تتركي لنا تجربتك معاه تحت و اذا لسه ما شريتيه أتمنى يكون البوست فادك تقرري .

all love

Ru.

Read More »