FOOD | سلطة سيزر الدجاج مع صلصلة صحية بطريقتي الخاصة

السلام عليكم و رحمة الله و بركاته

كيفكم يا مزز ؟ إن شاء الله تمام

اللي يدخل المدونة يفكرها مدونة طبخ على كثر البوستات اللي تتكلم عن الطبخ

بس

بما إني فاتحة المدونة عشان أشارككم بأفكاري و ستايل حياتي فأنا أكتب لكم البوست في   الوقت الحالي

قبل كم بوست و خصوصا بوست السناك الصحي

قلت لكم إني في رحلة للوصول للوزن المثالي و أحاول قد ما أقدر ألتزم بنظام حياة صحي و أمارس رياضة

و شاركتكم بأكثر من وصفة صحية أحبها و عشان نكمل بهالسلسة حبيت أضيف سلطة لذيذة و خفيفة

ممكن تعتبريها غداء أو سناك صحي تاخذيه للدوام معاك

طبعا كلنا نعرف سلطة سيزر الدجاج اللذيذة و المليانة سعرات لدرجة صارت تمتن مو تنحف

خصوصا لو كانت مغرقة بالصلصة !

و لأني أحبها مرة حبيت أسويها بطريقتي الخاصة و بصلصة صحية عشان آكل بدون تأنيب ضمير

الصوص سهله و بسيطه و تناسب أكثر من سلطة و ممكن تاكليها مع صدور دجاج أو سمك و بتكون يمي

طبعا زي ما قلت هالوصفة تناسب شهيتي أنا و ممكن بعض المكونات ما تحبيها

فتقدري تستبدليها بشي تحبيه

أهم نقطة عشان تستمري بأي نظام صحي هي إنك تأكلي و تمارسي كل شي تحبيه

تحبي السمك أكثر من الدجاج؟ كلي سمك حتى لو كل يوم !

تحبي المشي أكثر من الزومبا ؟ إمشي كل يوم!

وصلت الفكرة ؟

نبدأ~

مقادير السلطة لشخص واحد

خس مقطع حسب الحجم اللي تحبي ، أنا استخدمت روماين

ملعقة ذرة

ملعقة صنوبر أو لوز شرايح عشان يضيف قرمشة حلوة

شوية زيت زيتون

بصلة حمراء صغيرة

صدر دجاج

بالنسبة للصدور انا استخدمت صدور متبلة بنكهة الليمون و الفلفل من ماركة أميركانا لايف

جدا لذيذة و تعطي نكهة جديدة للسلطة و برضو جربت نكهة التوابل الإيطالية و جدا جدا لذيذة

تلاقونها في بنده أو أسواق التميمي في قسم المجمدات

و هذي صورتها 

بالنسبة للصوص أنا أخذتها من شيف جايمي أوليفر و كانت بديل لصلصة السيزر التقليدية

اللي كانت تحتوي على 300 سعرة

بينما الصوص حقنا فيه 70 سعرة بس في الكمية كلها و ما راح نستخدمها كلها في صحن واحد

مقادير الصوص

علبة زبادي قليلة الدسم

فصين ثوم

شوية ملح \ فلفل أسود \ كمون

شوية كزبرة أو بقدونس أو ريحان

عصير ليمون

نتفة خل و ممكن تستغني عنها

الطريقة

على نار متوسطة ضيفي شوية زيت زيتون في مقلاة و حطي صدر الدجاج عشان يستوي

و إقلبيه للوجه الثاني بعد 4 دقائق

ما راح يحتاج أكثر من 10 دقائق بالكثير فانتبهي لا تطبخيه أكثر من اللازم عشان لا ينشف و يقسى

إذا بتستخدمي صدور دجاج عادية فيفضل تبهريها بملح، فلفل أسود، شوية بابريكا

و شوية بهارات دجاج 

المكون السري هنا هو البصلة الحمراء ما تتخيلون قد ايش تضفي قرمشة لذيذة بدون ما تخرب النكهة

قطعي جزء بسيط منها لـ شرايح \ جوانح ضعيفة عشان طعمها ما يطغى عالباقي

و خليها على جنب

انتبهي مو كل البصلة ! بس ربعها أو أقل يعني بس كم شريحة هنا و هنا

على ما يجهز صدر الدجاج نسوي الصوص

في محضرة طعام ضيفي مكونات الصلصلة و اخلطيهم و تذوقيها عشان تتأكدي إنه بهاراتها أوكي

الصلصلة صلاحيتها أسبوع بالكثير يعني يعتمد على صلاحية الزبادي فشيكي عليه

في مقلاة صغيرة ثانية ضيفي بقية زيت الزيتون على نار هادية و بس يسخن حطي الصنوبر أو اللوز

حركيه بشكل مستمر لحد ما يتحمص للدرجة اللي تحبيها

شيلي صدر الدجاج و قطعيه شرايح أو مكعبات زي ما تحبي

في صحن التقديم ضيفي الخس المقطع و الذرة و فوقها شرايح البصل و الدجاج

فوقهم ضيفي ملعقتين صوص بالكثير لأنك لو كثرتي بيغطي طعمها على باقي المكونات

و آخر شي انثري اللوز\ الصنوبر على الوجه

و هذا الشكل النهائي 

زي ما قلت لكم اذا حابين تضيفوا شي أو تشيلوه فالخيار متروك لكم أهم شي تسووا شي يعجبكم و بتستمروا عليه

إذا كنتي ناوية تاخذي السلطة للدوام فالأفضل تخلي الصوص في حافظة ثانية و تستخدميها وقت التقديم

عشان ما تذبل المكونات

و صحة و هنا

لا تنسي تتابعي المدونة على حساباتها في السوشل ميديا

الموجوده فوق على يمين المدونة

و تشاركيني بصورة للسلطة لو نفذتيها

إذا حبيتي البوست لا تنسي تشاركيه مع أخواتك و صاحباتك

All love

Ru.