مراجعة | آلة القهوة دولشي جوستو Review | Dolce Gusto

السلام عليكم و رحمة الله و بركاته

مساء الخير، وحشتني المدونة كثييييييييييييير ☹

مع الأطفال و الدوام إنشغلت بس ما نسيتها و إن شاء الله راجعة لها بكم موضوع جميل و مفيد طبعاً.

تدوينة اليوم عبارة عن مراجعة لآلة القهوة دولشي جوستو ميني مي من نسكافيه، جتني هدية من عائلتي بمناسبة عيد ميلادي قبل سنتين تقريباَ، و جداً جداَ فرحت بها لأني كنت محتاجة بديل عن المقاهي خصوصاً أنه طريق الدوام ما فيه أي مقهى كويس و ستاربكس فلّس بي.

أول شي بكلمكم عنه هي خصائص الآلة:

طبعا هي محضرة قهوة بإستخدام كبسولات القهوة المخصصة لها، فيها خزان ماء بحجم 800 مل، تقريبا يسوي لك 3-4 أكواب قبل ما يحتاج إعادة تعبئة. سهلة الاستخدام لأنه ما فيها أي تعقيد، الأزرار اللي فيها هو زر التشغيل و الإطفاء، و فيها خمسة إعدادات لكمية القهوة حسب نوعها و عادة يكون مكتوب عالكبسولة، و عصا تحديد درجة حرارة الماء، فيها درجتين فقط حار و بارد، الحار اللي للمشروبات الحارة و الباردة يكون بدرجة حرارة الغرفة.  

فيها صينية تقطير بلاستيكية تجمع القهوة لو زادت عن الكوب بدل ما تنكب على سطح الطاولة، الحلو فيها إنها تنشال لو كنتي تبي تستخدمي كوب كبير. و معاها حامل الكبسولة اللي يحمل الكبسولة على ما تتحضر القهوة. الهيكل الخارجي كله مصنوع من البلاستيك، الآلة تشتغل على كهرباء 220 فولت.

الكبسولات

الآلة لها كبسولات مخصصة متواجدة بموقعهم الرسمي (هنا) و في السوبرماركت الكبيرة، لها أنواع الأصلية اللي من تصنيع نسكافيه و عادة يكون سعرها بحدود 30-38 ريال سعودي، و فيه أنواع اللي تكون من ماركات ثانية منها ستاربكس و إنتينسو و عادة يوصل سعرها إلى 49 ريال.

و لو حابين تستخدموا نوع ثاني، فيه كبسولات بلاستيكية مفرغة، ممكن تعبوها أي نوع قهوة مطحونة حسب اللي تحبوه و تنغسل بعد الإستخدام، و هذا رابط لو حبيتوا: هنا.   

الكبسولات متنوعة، النكهات الأصلية 15 نكهة، منها : كابتشينو، موكا، كاراميل ماكياتو، شاي لاتيه، شاي مغربي، شوكولاتة، فلات وايت، كورتادو، كافيه أو ليه، أمريكانو و نوعين إسبريسو.

طبعا العلبة يكون فيها 8 كبسولات قهوة و 8 كبسولات حليب بودرة و على ما أعتقد القهوة السوداء يكون فيها 16 كبسولة قهوة بس، كل كبسولة يكون مكتوب عليها أي إعداد تختاري لها و هل هي تستخدم حارة أو باردة. و مذكور على العلبة السعرات الحراية و المكونات و الحلو إنه فيه كبسولات غير محلاة أو بدون كافيين أو لايت بس مش متواجدة بكل مكان.

رأيي الشخصي 

عن نفسي أنا حبيتها، تسوي لي قهوتي الصبح بدون عفسة، حطي الكبسولة و إنتهينا، و العناية بها سهلة جداً بس بين فترة و فترة أمسحها بفوطة مبلولة عشان الغبار يروح و كل شهر أشغلها على الإعداد الحار بدون كبسولة عشان يمشي الماي فيها و تنظف من داخل.

الكبسولات الأصلية ما حبيت منها إلا الكابتشينو اللايت، سعراته قليلة و القهوة كويسة، أنا بشكل عام أفضل السوداء أو اللاتيه فما جربت أنواع الكارميل أو الشوكولاتة. و المفضلة عندي هي حقت ستاربكس اللي بالصورة تحت.

المساوئ

عندي كذا نقطة ما حبيتها كثير، أولا إن الحليب المستخدم بودرة، فمع الماء المضاف للقهوة و الماء المضاف للحليب حسيت القهوة مائية بزيادة، ما فيها كثافة الحليب و طعمه. بس طبعا هالكلام للأنواع اللي تحتاج حليب زي الكابتشينو.

ثانياً، الكمية اللي تسويها لكل كوب نوعاً ما قليلة، أتوقع تجي 150-200 مل بالكثير، يعني الكوب يتعبى نصه إلى ثلاث أرباعه فقط، أنا كنت مفكرتها بتعبيه كله.

ثالثاً، ما فيه فن لاتيه و لا رسمات و الرغوة اللي تطلع قليلة، لأن الآلة هي تطلع الحليب مش زي الماركات الثانية يكون محضر الحليب لوحده. 

بشكل عام أنصح بها، خفيفة و ما تاخذ مكان كبير، تكفي للإستخدام الشخصي و صوتها مو عالي كثير، القهوة كويسة، بس لو كنتوا من عشاق القهوة الساخنة يمكن ما تعجبكم كثير.

 سعرها في متناول اليد، تلاقوها في موقع دولشي جوستو أو إكسترا أو ساكو، سعرها تقريبا 525 ريال. متوفر لها حوامل للكبسولات بكذا شكل و أسعارهم معقولة، أنا شريت حقي من ساكو ب40 ريال تقريباً.

أتمنى المراجعة فادتكم و ساعدتكم في بحثكم عن أفضل آلة لكم، إذا تحبوا تشوفوها أكثر تابعوني على الإنستغرام، أحب أصورها و هي تحضر القهوة صباحاً، رابط الحساب موجود أعلى الصفحة و تنوروني.

All Love,

Ru.