السلام عليكم و رحمة الله و بركاته
كيفكم يا مزز ؟ إن شاء الله تمام
من بدأ الجو يتعدل و يحلو و أنا صايرة مدمنة شاي
خصوصا وقت العصرية إذا قعدت أسولف مع ماما الله يحفظها
و مؤخرا قمت أجرب أضيف أعشاب و نكهات زي النعناع و المردقوش و الحبق
أشتريهم حزم فريش من السوبرماركت و ما تكمل اسبوع الا ذبلت :(
فحبيت أشارككم بالحل اللي وصلت له عشان أحافظ عليهم فريش لمدة تفوق الأسبوعين
كل اللي تحتاجيه
أكياس شفافة و الأفضل تكون اللي تتسكر من فوق و يكون حجمهم أكبر
من كمية النعناع عشان لا تحشره
مناديل مطبخ أو فوطة نظيفة
العشبة اللي تبيها سواء نعناع \ كزبرة\بردقوش \بقدونس
الطريقة
أول شي نجيب العشبة اللي بنحفظها ، أنا بستخدم النعناع
أحطه على لوح التقطيع و أقص جذوره من تحت
بعدين أحطه بمصفاة و أغسله عدل عن التراب و الغبار اللي فيه
أحط الفوطة \ المنديل على طاولة المطبخ و أمد عليه النعناع و أخليه لحد ما ينشف تماما
أنا خليته قرابة النصف ساعه عشان أضمن انه ناشف
بعد ما ينشف النعناع
أجيب المنديل و ألفه بطريقة إنه يصير زي الجيب
أحطه داخل الأكياس الشفافه و أحط داخله النعناع
يعني يصير النشاف زي البطانه
و سكري الكيس عدل من فوق عشان لا يدخل هواء كثير داخل الكيس
و احفظيه بالثلاجة في وضع أفقي
و بكذا ان شاء الله بينحفظ لفوق الأسبوعين قبل ما يذبل
و بيمديك تستمتعي بالشاي لأطول فتره ممكنه
أتمنى إستفديتي من الطريقة
و لا تنسي تتابعي المدونة على حساباتها في السوشل ميديا
الموجوده فوق على يمين المدونة
إذا حبيتي البوست لا تنسي تشاركيه مع أخواتك و صاحباتك
و تتركي لي كومنت حلو زيك
All Love
Ru.
No comments:
Post a Comment