HAUL | مشترياتي من سنتر بوينت و H&M

السلام عليكم و رحمة الله و بركاته

كيفكم يا مزز؟ إن شاء الله تمام

مؤخرا رحت زيارة سريعة للسوق و أخذت منهم هذي الأغراض و حبيت أشارككم فيها

أول شي نبدأ بالأغراض اللي من سنتربوينت

أخذت من قسم المكياج بلشر ناعم من  ماركة برستيج

(لونه بالإضاءة الطبيعية)

أول مره أسمع بالماركة هذي بس من تجربتي للبلشر فلا بأس فيها بالنسبة لسعرها

اللون اللي أخذته صاير ما بين الوردي الغامق و البيج

 فيعطي للوجه نضارة وتورد طبيعي

و الحلو إنه يدوم لمدة أربع ساعات قبل ما تضطري تعيدي عليه

سعره : 19 ريال سعودي

ثاني شي أخذت من عندهم مرآية للشنطة

فيها مرايتين وحدة الحجم الطبيعي و الثانيه مكبره ثلاثة أضعاف

من برا لونها بنفسجي فاتح و عليها كرستالات على شكل وردة زي ما واضح بالصورة

حجمها حلو بس مشكلتها ثقيلة حبتين بسبب الكرستال اللي عليها

سعرها : بحدود الـ 22 ريال سعودي

H&Mنجي لمشترياتي من   

كل اللي أخذته من قسم المكياج الجديد

صار لي فتره أبي قلوس (ملمع شفاه) ما يكون أوفر و يبين حق بنات أصغر مني

شفت عندهم هذا و عجبني لونه حيييل

الكاميرا مو راضية تلقطه عدل بس ترا لونه وردي فاتح

 و لما ينحط عالشفايف ما يبين لون قوي بالعكس يعطيك لمعة هادية و لطيفة

و ما تحسين أنه شفايفك مدبقة

فيه ألوان كثيرة بس هذا أكثر واحد حبيته

سعره : 7 ريال  

نجي لآخر شي أخذته و اللي حدي حدي متحمسه له

كنت حابه أخذ عطر صغيرون للشنطة و تكون ريحته ثابته

عادة إذا اشتري العطور الصغيرة تكون مش أصليه و ثباتها بايخ أبو ربع ساعة

شميت هذا العطر و مت عليه لدرجة أخذت واحد ثاني لأختي

اسمه

CARIBBEAN CRUSH eau de toilette

ريحته هادية حيل و نفس اسمه تذكرك بشاطىء البحر و ريحة ورد هادية

وما يحتاج ترشين واجد

رشتين و يثبت تقريبا خمس ساعات

سعره : 69 ريال

أخذته قبل أسبوعين و لما جيت أحاسب قالت لي انه عليهم عرض واحد و الثاني مجانا و برضو خصم

فطلع سعر العطرين مع القلوس 22 ريال بس !

ما أدري اذا لسه العرض موجود أو لا بس لحقوا عليهم لا يفوتكم

خصوصا انه العطر ناعم و يصلح هدية للعيد 

إذا حبيتي البوست لا تنسي تشاركيه مع أخواتك و صاحباتك

و

لا تنسي تتابعي المدونة على حساباتها في السوشل ميديا

الموجوده فوق على يمين المدونة

All love

Ru.

Read More »

REVIEW| ريفيو كونسيلر MAYBELLINE AGE REWIND

السلام عليكم و رحمة الله و بركاته

كيفكم يا مزز ؟ إن شاء الله تمام

لأنكم حبيباتي حبيت أعوضكم عن انقطاعي و أنزل لكم بوستين مره وحده ! 

أمانةً أنا في الحقيقة بعيده نوعا ما عن المطبخ بس ما أدري ليه أغلب المواضيع اللي أنزلها تكون عن الطبخ :\ 

 ما علينا عشان أغير لكم شوي بسوي ريفيو لمنتج شريته قبل شهرين يمكن

و هالمنتج هو كونسيلر age rewind من ميبيلين ! 

اول شي عرفت المنتج من بنت حبوبه باليوتيوب اسمها thatsheart و كانت تمدح فيه كثير ، شفته بالصدفه في كشك بجمع الراشد بالخبر و على طول شريته بدون تردد ! 

(بوست أفضل قنوات المكياج عاليوتيوب هنا )

هو يعتبر كونسيلر معالج لأنه يحتوي على توت الغوجي و الهالاكسويل اللي يعمل على تخفيف الهالات السوداء حول العين ، في منه فاونديشن بنفس الشكل و لكن أشوف ناس كثيره تذمه و أنا ما جربت الا الكونسيلر بس.

يجي منه 4 درجات و هذي سواتش لها من النت: 

انا أخذت الدرجه light\pale nc15 ،  تعمدت أخذ لون أفتح بدرجه وحده عشان أستخدمه كهايلاتر مره وحده.

السعر

100 ريال.

طريقة استخدامي للمنتج

 كانت إني احطه تحت العينين و على أطراف الفك ، على منطقة الشنب و حوالي الفم و على أي منطقة فيها مشكلة ، المنتج شكله زي الرول و أول ما تحطيه يبان ثقييل بس أول ما تبدأي شغل عليه بيندمج بسرعة البرق يعني الثقل اللي قبل شوي كله بيختفي ، بعد ما أدمجه أحط فوقه بودره عشان تثبته و باقي الميك اب. 

انا استخدمه للجامعه فعادةً أحطه على الساعه سبعه و أرجع البيت الساعة 2 و الكونسيلر بعده موجود فمن ناحية الثبات بيظل معاك فوق الخمس ساعات ، و برضو يخفي العيوب بشكل ممتاز يعني حطيه و لا تشيلي هم أبدا .

مشكلتي الوحيده معاه هو أنه يقلب لون عجيب أحيانا ، يعني اذا رجعت البيت و شفت روحي بالمرايه أحس انه اللون فاااااتح كني حاطه لمبه تحت عيوني و أحيانا رمادي ، فأتوقع المشكلة تنحل لو أخذت نفس لون بشرتي بالضبط . 

حطي في بالك اني من النوع اللي ما اعدل الميكب خلال النهار 
خلاص أحطه مره وحده و بس 

انا جدا حبيت الكونسيلر بس أحس سعره شوي غالي بالنسبة لكونه درقستور خصوصا لو اللي بتشتريه وحده ميزانيتها محدوده، يعني مثلا كونسيلر فيت مي من نفس الشركه سعره في السبعينات و جودته ممتازه ، بس ما يمنع انه يكون من أفضل الكونسيلرات اللي استخدمتها و انصح فيه بقوه و أكيد برجع اشتريه مره ثانيه. 

All Love:

Ru.

Read More »

HAUL\REVIEW| RIMMEL LONDON APOCALIPS MATTE LIQUID LIPSTICKS + MAKEUP REMOVER ريفيو أرواج ريميل السائله + مزيل المكياج

السلام عليكم 

كيفيكم يا مزز؟ ان شاء الله تمام

اليوم رجعتلكم ببوست حلو و لزيز عن أرواج ريميل الجديده Rimmel London apocalips matte lipsticks 

المجموعة صار لها فتره نازله و مكسره الدنيا و ما ظل يوتيوبر و بلوقر ما تكلمت عنها فقررت أشتريها و أجربها بنفسي :)

قبل فتره بسيطه سنتربوينت كانوا مسويين عرض حلو على الميك اب عندهم و خصوصا ريميل ، العرض كان اشتري بقيمة 100 ريال و احصلي على جل لاينر + مسكره سكاندل ايز + قلم كحل + حقيبه مكياج مجانا ، بما اني من عشاق مسكره سكاندل ايز البرتقاليه و سبق و تكلمت عنها (هنا ) ، فكان العرض جدا مناسب لي ! 

رحت و شريت لي 3 أرواج و مزيل المكياج و حصلت على هديتي :) خصوصا اني كنت ابي اجرب الجل لاينر حقهم

بسم الله نبدأ :

أرواج Rimmel London liquid lipsticks 

هالمجموعة في منها 9 ألوان و هذي سواتش لهم من النت 

  

أخذتهم بناءا على المدح الرهيب اللي جاهم ، شريت اللونين رقم 9 و 4 

السعر : سعرهم بالتخفيض تقريبا 38 ريال لكل واحد و اتوقع قبل التخفيض كانوا في السبعينات 

تجربتي : الأرواج قمة في الروعه صراحه خصوصا العنابي اللي في الصوره اللي تحت

سهل انك تحطيها و بالرغم من انها مطفيه الا انها ما تجفف الشفايف ، الفرشاه اللي معاها جدا جميله و سهل استخدامها و ما تعفس الدنيا ، ثابته تقريبا 3 او 4 ساعات بالكثير ، سهل انك تشيلينها و ما تعذبك و تعطي الشفايف امتلاء حلو أعطيها عشره على عشره 

أرواج Rimmel provocalips 16 hours 

السعر : نفس سعر اللي فوق،  سعرهم بالتخفيض تقريبا 38 ريال لكل واحد و اتوقع قبل التخفيض كانوا في السبعينات 

تجربتي : الأرواج هذي عجيبه غريبه ، انا ما اخذت منها الا لون واحد اللي هو heart breaker و هذا سواتش له من النت 

اللون صاير بني على برتقالي نفس ستايل كايلي جينر ، اللون روعه و جدا جميل و خصوصا انه نص مطفي و نص يلمع ، الطرف الثاني من الأنبوبه فيه لمعه شفافه لو حبيتي تخليه زي القلوس.

انا لأني أفضل المات صرت أحطه و بس ينشف أحط عليه مرطب شفايف شفاف .

العيوب : الروج اذا نشف و لا حطتي عليه القلوس يصير فاااااااشل لانه بيلزق شفايفك مع بعض كأنك حاطه صمغ و بيشوه المنظر ، فإنتي تفادي هالشي بإنك تحطي القلوس أو مرطب الشفايف .

برضو جدا صعب في الإزاله و ثااااااااااابت بشكل مزعج ، يعني هو مكتوب عليه انه يظل 16 ساعه و شكله صدق يظل هالمده لأنه اذا حاولت أشيله ما ينفع معه شي ، صرت أحط طبقه ثانيه منه و بعدين أمسح بسرعه قبل ما تنشف و هذي شغله الصراحه .

هو الصراحه حلو بس لأني أقعد أحاتي شلون بشيله فبعطيه خمسه من عشره  

نجي لأخر شي شريته اللي هو مزيل المكياج من ريميل just let it go

السعر: 35 ريال اذا مش غلطانه 

تجربتي : اول ما شريته ما حبيته ابدا ابدا ابدا لأني كنت حاطه من الروج البني اللي قبل شوي و لا قدر يشيله فقلت عنه بايخ بس بعدين قررت أعطيه فرصه ثانيه لأني كنت حاطه فل ميكب ، طبعا لازم حاطه مسكره و ايلاينر و و و فقلت لو شال لي المسكره يطلع بطل لأني دايما أتعذب في شيلها. 

قبل كنت أستخدم المناديل المرطبه عشان أشيل مكياجي و هذي أول مره استخدم مزيل من هالنوع و والله طلع بطل و محى المسكره عن بكره ابيها! 

حبيته لأنه لطيف و خفيف و يصلح لكل أنواع البشره و بعطيه ثمانيه من عشره 

أتمنى أنكم استمتعتم بالبوست و أشوفكم على خير 

:all love 

Ru.

Read More »

ٌREVIEW | NIVEA BB CREAM 5IN1 BEAUTIFYING MOISTURIZER بي بي كريم نيفيا 5في1 مرطب تجميلي

السلام عليكم

كيفكم يا مزز ؟ ان شاء الله تمام

هالمرة حبيت أسوي لكم ريفيو على منتج جديد نسبيا ، اللي هو بي بي كريم من نيفيا Nivea BB cream 5in1 beautifying moisturizer  ، للي ما يعرف البي بي كريم هو كريم يستخدمونه الآسيويات من زمان و حاليا انتشر في بقية العالم بعد ما قامت تصنعه الشركات المعروفه.

هو عبارة عن نسخة مخففه من كريم الأساس و يتفوق عليه باحتوائه لى أملاح معدنيه و مجموعه فيتامينات و حماية من الشمس ، هو جدا خفيف و تغطيته تتغير على حساب الماركة اللي انتي شاريتها منه 


 عادة يجي في ثلاث ألوان فقط فاتح و متوسط و غامق ، و على حسب كلام المسوقين له المفروض أنك بس تحطيه راح تلاحظي توحد اللون و تحسن البشرة مع شبه تغطية للعيوب

لازم تعرفون قبل ما تشترون أي بي بي كريم إنه ما يصلح أبدا للبشرة التعبانه ، يعني ما تكون بشرتك مثلا مليانه حبوب أو فيها ندبات لأن الكريم ما راح يغطيها تماما 


 عادة يكون مناسب للبشرة الصافيه أو اللي مشاكلها بسيطة، أيضا الكريم قائم على وجود الدهون فيه عشان يكون قوامه كريمي فإذا بشرتك دهنيه\مختلطه بتحتاجين إنك تثبتيه ببودرة. 

المميزات المذكورة على العلبه

      مناسب لجميع البشرات لانه مرطب و بنفس الوقت ضد اللمعان و يدعي انه يقدم 5 فوائد فورية للبشرة :

  
    1- ينسق لون البشرة و ينقي مظهر المسامات 

      2- يغطي عيوب البشرة مثل الشوائب و علامات التعب ، الهالات السوداء، البقع ، البشرة المحمره 
و الخطوط الرفيعه

      3- يمنح الإشراقة للبشرة و يبرز لونها الطبيعي 

      4- يوفر ترطيبا خفيفا و سريع الإمتصاص 

      5- يساعد في حماية البشرة من المؤثرات البيئية الناتجة عن التعرض للشمس و علامات التقدم في السن المبكرة مع SPF10

مكان الشراء و السعر

    شريته من هايبر ماركت بنده و كان عليه تخفيض ، أخذته ب 18.95 ريال.

العيوب

شريت الدرجة الفاتحه منه على اساس بيكون لونه تمام لكنه أبدا ما ناسبني لأن الدرجة الفاتحه كانت غامقة و تناسب وحده حنطيه أو لونها متوسط أكثر أما علي كانت كأني مسويه تان و احترقت و اللون أبدا مش طبيعي 

 لازم أول ما تطلعيه من العلبه توزعيه على وجهك لأنه خلال أقل من دقيقه بيثبت ! هذي مشكله كبيره نظرا لكثافة المنتج 

 الكريم جدا ثقيل أول ما تطلعيه كأنه كريم نيفيا الابيض العادي، ريحته نفس ريحة الكريم العادي برضو 

التعليب عادي بس تمنيت أنه يجي مع بمب لأنه لازم تاخذي كميه بسيطه أما انا حطيت منه كثير أول مره و تعبني كثير و أنا أشيله << حسب كلام اللي استخدموه فهو يظل لفوق 8 ساعات.

رأيي الشخصي

عشان ما أظلم الكريم عطيته أمي و استخدمته أكثر من مرة و حبته حيل للدوام 

اللون مناسب لها و كمان التغطية و تقول انه خفيف و ما تحس انها حاطه شي على وجهها 

كسعر المنتج ممتاز بس ما حبيته لأنه الألوان جدا محدودة و كلها غامقة فقبل لا تشتريه 
جربيه على يدك و شوفي إذا يناسبك 

اذا كنتي جربتيه و لك رأي أخر أتمنى تذكريه لي تحت :)

all love 

Ru.

Read More »

HAUL | مشترياتي من الميك اب 2015

السلام عليكم 

كيفكم يا مزز ؟ ان شاء الله تمام 

سوري على الانقطاع اللي صار بس عرس اختي بعد العيد على طول و قاعدة أجهز له و ماخذ وقتي كله 

ما علينا، قبل فتره البلوقر أسماء صاحبة مدونة thatredlip  قالت لنا بالسناب عن  كشك موجود في الراشد جنب فرع جرير و باريس جاليري ، يبيع منتجات ذا بالم و elf و الماركات اللي نشوفها باليوتيوب.

فرحت أشوفه و أتأكد إذا الماركات اللي فيه أصلية و الا لا و الصراحة جدا حبيت الميك اب و خذت منه للعيد ، فحبيت أشارككم باللي شريته.

أول شي أخذته هو : 

ELF blush palette 

يحتوي على أربع ألوان : وردي فاتح ، بني فاتح يصلح لكونتور خفيف ، فوشي بجليتر ، وردي غامق . 

للأمانه لسه ما جربته بس كثير حبيته ، الألوان مش أوفر و تناسب استخدام كل يوم 

وهذي الألوان بدون تعديل 

سعرها 85 ريال 

ثاني شي أخذته هو 

FOREVER52 long lasting lipgloss

بالدرجة NLC109

الروج يجلط من حلاته، لونه أحمر قاني بس مو غامق كثير ، حاطته الحين و انا قاعده أكتب لكم ، اول ما تحطينه يلمع بس بعدين ينشف و يقلب على مات ، لحد الحين ما نشفت شفايفي و شكلها حلو مش متقشر ، سمعت عنه بالانستجرام و حبيت أجربه و جدا عجبني ، لحد الحين صار لي ساعتين حاطته و أكلت و شربت و ما راح بس جدا حلو 

سعره 35 ريال 

ELF pressed mineral powder 

بالدرجة golden 6150

حبيت أجرب البودره لأنها خفيفه خصوصا إن بشرتي جافة و البودره ما تناسبني بس اذا ما حطيت أحس ان مكياجي ناقص ، فقعدت أدور على شي خفييييف و لقيت هالبودره ، لونها مناسب جدا بس لسه ما جربتها.

السعر 75 ريال

ELF flawless finish foundation with SPF 15

بالدرجة porcelain 

سمعت كثير مدح عليه و انه خفيف و يناسب الاستعمال اليومي فقلت بجربه للكليه 

سعره 85 ريال

MAYBELLINE instant age rewind concealer 

بالدرجة light\pale

السبب الأول اللي أخذت بسببه هالكونسيلر هو حبيبة قلبي thatsheart اللي سبق و تكلمت عنها في بوست أفضل قنوات المكياج  ، هو قديم شوي فما تلاقيه الا اونلاين ، هارت دايما تستخدمه و تمدحه فأول ما شفته خذته و انا مغمضه ، كل الكونسيلرات اللي استخدمتها تتأكسد و تقلب رمادي اخر النهار و تقهرني ، بس حاطه امال عاليه عليه ، عيبه انه مافي الا 3 درجات بس :\ 

سعره 100 ريال 

قلم حواجب من silver lady  بـ 10 ريال 

Rimmel scandaleyes in black and Rimmel exaggerate eyeliner 

أكثر شيئين ما استغني عنهم ، المسكره تكلمت عنها من قبل و تلاقيه هنا 

و الكحل أسهل كحل عشان ترسمي فيها الكات ايز ، فرشته قاسيه شوي فتساعدك ترسمي خط مستقيم و لونه أسود غامق و ثابت فوق ال6 ساعات و أستخدمه صار لي فوق الثلاث سنوات و انصحكم فيه و بقوة.

الماسكرا ب55 ريال و الكحل ب45 ريال .

هذي الأشياء اللي أخذتها و كثير حابتها و ان شاء الله بجربها و بعطيكم رأيي فيها 

 (ملاحظه : يا ريت تكتبوا لي تحت اذا كان عاجبكم الخط الكبير أو تفضلوا الخط الصغير عشان اعتمده)

All love:

Ru.

Read More »