أمومة | تجهيزاتي اللي استفدت منها كثير

السلام عليكم و رحمة الله و بركاته

كيفكم يا مزز؟ إن شاء الله تمام

و أخيرا رجعت للتدوين بعد انقطاع ثلاثة شهور تقريبا

الحمدلله خلال هالإجازة البسيطة أنجزت أشياء كثيرة و أهمها

إني تخرجت من الجامعة و حصلت على وثيقتي

و الأهم من كذا إني و بفضل من الله صرت أم لأول مرة

في ليلة رأس السنه جبت بنتي حبيبتي "رقية "

و هي اللي أشغلتني عن المدونة بس لا تخافوا راجعة لكم بتدوينات جميله و أفكار جديدة

و إن شاء الله بنرجع لروتين النشر المعتاد

طبعا زي ما تعرفوا أنا فتحت المدونة عشان أشارككم بحياتي و إهتماماتي

و بما إن الأمومة صارت جزء لا يتجزأ مني فكان واجب إني أضيف شي بالمدونة عنها

نفيد و نستفيد من تجاربنا و تجارب غيرنا

و هذا بيكون أول بوست في سلسلة الأمومة الجديدة

هالمرة حبيت أشارككم بالتجهيزات اللي شريتها و صدق  استفدت منها

أول ما بدأت أجهز لبنتي دورت قائمة بالأشياء اللي لازم أشتريها 

و الأغلبية ما ذكروا الأشياء اللي بقولها 

نبدأ أول شي

صابون غسيل الرضاعات السائل من pigeon

هذا الصابون جاء هدية مع رضاعات بنتي

قبل كنت أستخدم صابون فيري عشان أنظف الرضاعات و كان مزعج مرة

لأنه يطلع رغوة كثير و ما تضمني إنه راح مع الماي

فكنت أظل فترة طويلة و أنا أغسل الرضعات عشان أتأكد إنها نظفت

لما جربت هذا الصابون عجبني كثير

أول شي ينظف و يعقم و ما يطلع رغوة

و بس يحتاج خمس ثواني تحت الماء الجاري عشان يروح

و آمن جدا عالأطفال و ممكن تستخدميه على الفواكه و الخضار أو الألعاب

متوفر في الصيدليات ب25 ريال تقريبا

مخدة الرضاعة

حرفيا ما أدري ايش كنت بسوي من دونها

هي مخدة تجي على شكل حرف C

تحطينها حوالين خصرك و تسدحي البيبي عليها بحيث يكون بمستوى صدرك

فيسهل عليه الرضاعة و يصير وزنه كله عالمخدة فما يتعور ظهرك

جدا ممتازه للرضاعة الطبيعية خصوصا للي أول مره تجرب

أما الرضاعة الصناعية ما أتوقع تستفيد منها كثير

و الحلو فيها انه ممكن تستخدميها كمخدة للأم

أو تحطيها حوالين الطفل اللي تو يتعلم يجلس 

عشان لو طاح يكون حوله شي لين و ما يتعور

أخذتها من سنتر بوينت أيام التخفيضات

كانت ب175 ريال و أخذتها بعد التخفيض ب50 ريال

شنطة محترمة لأغراض البيبي

مهم جدا تستثمري في شنطة ذات جودة عالية عشان أغراض البيبي

اختاري وحده من ماركة معروفة و تكون متينة و قوية و فيها جيوب كثير عشان تتحمل

و يكون حجمها كبير شوي بحيث انها تشيل أغراضك كلها

من ملابس و اغراض تبديل الحفاضة و أكل و و و

أنا حقتي نفس اللي بالصورة أخذتها من سنتربوينت و كانت أغلى من باقي الشنط

تقريبا سعرها 200-230  ريال

حبيتها لأنها واقفة و فيها جيوب كثيرة و السير حقها عريض

فيتوزع الثقل عليه بشكل متساوي

السرير المحمول

أخذت هذا السرير لأنه لما كنت في فترة النفاس ببيت أهلي

كانوا كلهم يقعدوا بالصالة و أكون أنا لحالي بغرفتي فأطفش

و صعبة أخلي بنتي لحالها بالغرفة

فشريت سرير متنقل من محل سابل بالخبر

تقريبا ب79 ريال

يجي مثل السلة و له حمالات على جنب تقدري تشيليه معك أي مكان

و فيه منه أشكال كثيرة و متوفر من ماركات كثير

ممكن زيي تاخذي واحد رخيص و بسيط

و ممكن تاخذي واحد غالي و محترم

أنا أخذته بس تمشية حال لحد ما أخلص النفاس و أرجع بيتنا

بس للأمانه اللي شريته أبدا ما عجبني

لأنه رخيص مو محشي اسفنج كثير فحسيته شوي قاسي على ظهر بنتي

و مع الاستخدام زي اللي ماعت جوانبه

بس لو أخذتي واحد من ماركة كويسة أتوقع بيطول معك

هذي هي الأشياء اللي حسيت إني جد جد استفدت منها و ما ندمت إني شريتها

و أنصح كل حامل تجهز إنه تجيب منها

طبيعي انك تشتري أشياء و ما تعجبك هذي هي حلاوة التجربة عشان المرة الجاية 

تعرفي ايش تصرفي فلوسك عليه

بس حلوة الوحدة تبحث قبل تشتري عشان تضمن جودة المشتريات

أتمنى تكونوا استفدتوا من تجربتي وإذا كان عندك اقتراحات ثانية اتركيها بالكومنت عشان نفيد بعض

لا تنسي تتابعي المدونة على حساباتها في السوشل ميديا

الموجوده فوق على يمين الصفحة

إذا حبيتي البوست شاركيه مع أخواتك و صاحباتك

Sharing is caring~

All love

Ru.