FOOD | عصير البطيخ الأحمر

السلام عليكم

كيفكم يا مزز ؟ ان شاء الله تمام

اعتذر لكم عن التأخر اللي حصل ، النت انقطع فتره و ما قدرت أنزل لكم بوست  

ما علينا ، الكل يعرف انه الصيفية بالدمام غير ، حر و عرق و رطوبه يا سلااااااام مزيج ممتاز،

بس و لا يهمكم جاييه لك ببوست باااااااااااااارد يسرسح عالقلب 3> 

طبعا بس يجي الصيف يبدأ موسم الجح\ البطيخ الأحمر\ الحبحب سموه اللي تبون بس ما يرّوح الحر الا هو !

فوائد الجح كثثثيره ، الفيتامينات اللي يحتويها و انه يساعدنا نشرب ماي و طعمه لذيذ و الأهم انه يساعد في تنزيل الوزن J

 قبل كم يوم شارين بطيخه صغنونه و طلعت مو حاليه فما عجبتنا بالأكل ، بدال ما أرمي نعمة ربي قررت أسويها عصير !

عشان حتى الصغار يقدرون يشربونها و يستمتعون بفوائدها بدال العصاير المعلبه اللي مليانه سكر و مواد حافظه.

أول مره سويت العصير ظليت ساعه كامله لحد ما شلت الحبوب اللي فيه ، المره الثانيه تعلمت الطريقه الصح و بربع ساعه كان عندي ابريق لذيذ من العصير.

المكونات اللي تحتاجيها :

1-      الجح\ البطيخ الأحمر\ الحبحب الكميه اللي تبيها

2-      كاس ماي

3-      مغلفين محلى ( استخدمت ستيفيا)

4-      قالب ثلج كامل

5-      سكين كبيره

6-      مصفاه

7-      خلاط

8-      طاسه كبيره ( انا سويت كميه كبيره قرابة النص بطيخه فاستخدمت قدر كبير شوي عشان اضمن ما يكب بره)

الطريقة:

باستخدام السكين قطعي البطيخ لمكعبات كبيره  

 حطيها بالخلاط و ضيفي كاس الماي و تأكدي انك تغطي الخلاط عدل و شغليه.

بعد ما يصير سائل ،حطي المصفاه فوق الطاسه و صبي فيها العصيرو  حركي المزيج لحط ما يصفى من الحبوب و بتبقى عندك الألياف في المصفاه

رجعي العصير المصفى للخلاط و ضيفي عليه الثلج و المحلى و اخلطيه

صبي العصير في كاسات حلوه و زينيه بأوراق نعناع و صحتين و عافيه !

ودعي حر الصيف مع هالعصير الصحي و استمتعي بفوائده 

All love:

Ru.