اصنعي بنفسك | معطر الفم برائحة النعناع المنعش

السلام عليكم و رحمة الله و بركاته

كيفكم يا مزز؟ إن شاء الله تمام

و أخيرا بوست ما يتكلم عن الطبخ

  XD

ما علينا

كل أنثى بالحياة يهمها مظهرها و إطلالتها تكون حلوة و مهندمة

طبعا بالإضافة لـ اللبس الحلو و الشعر المرتب أكيد الرائحة تأثر بشكل كبير

و

كثير مننا تهتم بمزيلات العرق و العطور و تنسى رائحة مهمة ما تشيك عليها

إللي هي " رائحة الفم "

ممكن تكوني بقمة أناقتك و كشختك بس ريحة فمك مش حلوة و تنفر الناس منك

فتروح الكشخة عالفاضي !

طيب ايش الحل؟

أكيد تنظيف الأسنان و اللسان بشكل دوري له أكبر أثر على التخلص من الريحة

و إذا كنتي مهتمة بهالأمر و لا زالت الريحة موجودة فلازم تراجعي دكتور لأنه ممكن يكون علامة على مرض لا سمح الله

أنا  ما بتطرق للأمر من هذي الناحية أنا جايبة لك حل مؤقت و سهل

حق إذا كنتي برا البيت و ما يمديك تغسلي أسنانك أو إذا كنتي بالدوام و إحتجتي شي ينعشك بسرعة

الحل هو بخاخ الفم !

علبة صغيرة و لطيفة فيها إسبراي بنكهة و ريحة حلوين كلها بخة و الريحة تختفي

طبعا متوفر بجميع الصيدليات و فيه الغالي و الرخيص

بس أنا جربت كذا نوع و ما عجبوني

بعضهم الريحة قوية مره و بعضهم طعمه خايس ينكد عليك

فقررت أسوي لي واحد بالبيت

جدا سهله الطريقة و أرخص من إنك تشتريه

الأدوات

علبة بخاخ فاضية 

(أنا استخدمت بخاخ عندي من قبل بس نظفت العلبة )

ملعقة قرفة مطحونة

ملعقة قرنفل  (المسمار اللي يحطوه مع الرز)

ست قطرات زيت النعناع

(تلاقيه بالصيدلية أو عند العطار)

ماء

الطريقة

في قدر خلي الماء يغلي و ضيفي عليه القرفة و القرنفل و خليهم عشر دقايق يغلوا عشان تطلع النكهه تمام

بعدين شيليه من على النار و ضيفي قطرات زيت النعناع و خليه يبرد

صفي الماء من القرنفل و صبيه بالعلبه الفاضية

و احفظيه بالثلاجة عشان يظل أطول فترة ممكنة بدون لا يخرب

و بكذا صار عندك معطر فم ريحته حلوه و يقضي على البكتيريا و الأهم من هذا كله خالي من المواد الكيماوية

و أخيرا يمديك تاكلي اللي تبي بدون ما تحاتي الريحة

:) 

شاركوني بتجاربكم تحت بالتعليقات او على حسابات المدونة

و

لا تنسي تتابعي المدونة على حساباتها في السوشل ميديا

الموجوده فوق على يمين الصفحة

إذا حبيتي البوست شاركيه مع أخواتك و صاحباتك حتى تعم الفائدة

All love

Ru.

Read More »

اصنعي بنفسك | مقشر منزلي لشفاه ناعمة كالسحاب

السلام عليكم 

كيفكم يا مزز ؟ ان شاء الله تمام

كله عارف انه العطلة الصيفيه قربت و قربت معاها المناسبات و الزواجات و الأعراس ، و أكيد الحين الأسواق و المشاغل بتمتلي حريم و كل وحده أكيد تبي طلع أحلى وحده بالمناسبه حقتها.

---

ممكن تصرفي بالهبل على فستان روعه و فنانه ميك اب محترفة بس صدقيني ما راح تطلعي حلوه اذا كانت بشرتك تعبانه او شفايفك مشققه ، و أتوقع كلنا صادفنا ناس كذا بالأعراس وجوهم معبية مشاكل و بدل ما يعالجوها يغطوها بكيلوين فاونديشن ! 

مثل الأخت :

بذمتكم أدفع مبلغ قريب ال700 ريال عشان يطلع وجهي كذا ؟ صدقوني كلها غسول و مقشر و انتهى الموضوع ! 

عالعموم الحمدلله الوعي بهذي الأمور تحسن كثيرا و الناس انفتحت و صارت تعرف اللي يناسبها و اللي ما يناسبها فالنقطه اللي كنت أبي ألفت نظركم لها هي منطقة مهمة بالوجه و الكثير منا ينساها ألا و هي الشفاه .

كثير تجي عرس و إلا حفله و هي حاطه روج على شفايف مشققه و حالتها حاله و تخرب شكلها مع أنه العناية بالشفايف مرررررة سهله ما تحتاجي الا مقشر و مرطب بس و شفايفك بتصير ناعمه.

طبعا أول مسبب للجفاف و التقشر هو عدم شرب كمية كافية من الماء فالله لا يهينك قومي جيبي كاسة ماي تشربيها على ما تخلصي البوست :)

>> يقالك بتشهيكم بالماي xD

بعد ما شربتي ماي جاء وقت التقشير، في كثييير من الماركات اللي منزله مقشرات شفايف و أولهم ذا بودي شوب 

تمرريه على شفايفك مثل الروج العادي و بعدين تفركيه بصبعك بشوي شوي و تمسحيه ثم ترطبي ، و مرطبات الشفايف أشكال و ألوان ما ظلت ماركه ما طلعت لها واحد و أي واحد بيضبط معك .

فازلين منزله علبة صغنونه للشفايف مرررره كيوت و ترطيبها عالي :

نجي للمهم  زبده البوست كلللله ، المقشر ممكن تسويه بالبيت و ما ياخذ منك دقايق ، أنا دائما أسويه إذا كنت ناويه أحط روج محترم أحمر و إلا فوشي مثلا ، أسويه و دقيقتين الا أنا خالصه و روجي يمشي بكل سلاسه . 

كل اللي يتحتاجيه : 

1- نص ملعقة  زيت زيتون

2- ملعقة سكر

3- فازلين أو أي مرطب

الطريقة:

جيبي لك طاسه\زبديه\سلطانيه اللي هو ، و حطي فيها ملعقة سكر و نص ملعقة زيت زيتون و اخلطيهم مع بعض ، 

 بعدين بصبعك خذي شوي و افركيها بشفايفك على شكل حركات دائرية لمدة 30 ثانيه ، اغسلي شفايفك و حطي عليها مرطب 

و بكذا انتهينا ، الحين لو حطيتي أي روج بيطلع زي المزه اللي تحت ;) 

All love

Ru.

Read More »

اصنعي بنفسك | راس الدش مسدود ؟ بسيطه !

السلام عليكم 

كيفكم يا مزز ؟ ان شاء الله تمام 

اليوم بعلمكم حيله تعلمتها قبل فتره و خلصتني من قرف تنظيف راس الشاور و التخلص من الأملاح اللي تسده و تخرب علي الدش.

مثل ما هو معروف ، ماي المملكة مالح جدا كونه جاي من البحر و هالشيء يسبب ترسب الأملاح و يسد لك مواسير البيت ، و تنظيفه يجيب الهم ! 

 نظفت و نظفت و نظفت لحد ما طفح الكيل و قررت ألجأ للعم جوجل و الحمدلله لقيت حل بسيط و سهل و غير متعب أبدا !

كل اللي تحتاجينه :

1- كيس 

2- خل أبيض 

ايون خل أبيض ، تفكي راس الشاور و تحطيه بالكيسه و تصبي فوقه الخل و تخليه ينقع ليله كامله و الصباح بيرجع الشاور كنه جديد و الريحه بتروح لا تخافوا :) 

او ممكن تصبي الخل في الكيسه و تربطيها حول الراس زي كذا :

أتمنى تجربوها و تستفيدوا منها و تتخلصوا من مهمة التنظيف الغثيثه هذي :)

all love:

Ru.

Read More »

اصنعي بنفسك | زيني مفاتيحك بنفسك

مرحبا جميلات !

كيفكم ؟ إن شاء الله تمام :)

بوست اليوم خفيف و لطيف ، راح أتكلم عن المفاتيح !

 ما أتوقع وحده فينا ما عندها عالأقل مفتاح واحد في شنطتها ، و أكيد شكله جدددددا عادي كأي مفتاح فضي و تلخبطين بينه و بين المفاتيح الثانية و إنتي تحاولين تفتحين الباب و شايلة معاك أغراض الدنيا صح ؟ 

طيب لو قلت لك عندي لك فكرة حلوة ! ليه ما تلونيهم عشان تفرقين بينهم ؟ بتقولين قديمة و محلات المفاتيح تسويها ! 

بقولك لا ! زينيهم بطريقتك الخاصة بدون محل مفاتيح و لا شيء ، الموضوع كله ينحل بنقطتين مناكير 

كل اللي راح تحتاجينه هو :

1- مفاتيحك العادية بعد ما تنظفيهم  .

2- ورقة كبيرة أو منديل تشتغلين عليه عشان تضمنين نظافة المكان.

3- مناكير غليتر أو أي لون و سوي أي تصميم تحبينه و لكن تأكدي أنك ما تلونين الجزء اللي يدخل بالقفل عشان

ما يخترب المفتاح !

ملاحظة: بعض المناكير يحتاج تحطين طبقتين أو أكثر عشان يبان بس أهم شي الصبر لين ما يجف ! لأنهم ممكن يلتصقون ببعض لو ما نشفوا عدل.

ابتكري الشكل اللي تحبيه و ممكن تستعيني بالنت اذا احتجتي بعض الالهام ، انا جمعت لك كم تصميم حلو من النت تحت :

 

 

و طبعا لا تنسوا تقولوا لي اذا جربتوا أي تصميم أو توروني  تصاميمكم الخاصة و بالتوفيق !

all love

Ru.

Read More »